സെന്‍കുമാര്‍ വീണ്ടും പൊലീസ് മേധാവി;ബഹ്‌റ വിജിലന്‍സിലേക്ക്

സംസ്ഥാന പൊലീസ് മേധാവി സ്ഥാനത്തു നിന്ന് മാറ്റിയതിനെ ചോദ്യം ചെയ്ത് സുപ്രീം കോടതിയില്‍ ടി പി സെന്‍കുമാര്‍ നേടിയ അനുകൂല വിധിയുടെ പശ്ചാത്തലത്തില്‍ സര്‍ക്കാര്‍ വീണ്ടും അദ്ദേഹത്തെ ഡിജിപിയായി നിയമിച്ചു,മുഖ്യമന്ത്രി ഒപ്പിട്ട ഉത്തരവ് ശനിയാഴ്ച കൈമാറും.സെന്‍കുമാറിനെ പുനര്‍നിയമിക്കാനുള്ള കോടതി ഉത്തരവ് നടപ്പാക്കത്തതിന്റെ പേരില്‍ സര്‍ക്കാരിനെ സുപ്രീം കോടതി രൂക്ഷമായ ഭാഷയില്‍ വിമര്‍ശിച്ചിരുന്നു. ടി പി സെന്‍കുമാര്‍ ഡിജിപി ആകുന്നതോടെ ആ സ്ഥാനത്തുണ്ടായിരുന്ന ലോക്‌നാഥ് ബഹ്‌റയെ വിജിലന്‍സ് ഡയറക്ടറായി നിയമിക്കാം.വിജിലന്‍സ് ഡയറക്ടര്‍ സ്ഥാനത്തുണ്ടായിരുന്ന ജേക്കബ് തോമസ് നിര്‍ബ്ബന്ധിത അവധിയില്‍ പ്രവേശിച്ചതു മുതല്‍ ബഹ്‌റയായിരുന്നു ആ സ്ഥാനവും വഹിച്ചിരുന്നത്.ജേകകബ് തോമസ് ഒരു മാസം കൂടി അവധി നീട്ടിയ സാഹചര്യത്തില്‍ അദ്ദേഹത്തിനുള്ള നിയമന ഉത്തരവ് വന്നിട്ടില്ല, വെളളിയാഴ്ച വൈകീട്ടു നടന്ന സംസ്ഥാന സെക്രട്ടറിയേറ്റ് യോഗത്തില്‍ സെന്‍കുമാറിനെ പുനര്‍നിയമിക്കാനുള്ള ഉത്തരവ് പുറപ്പെടുവിക്കാന്‍ മുഖ്യമന്ത്രിക്ക് നേതൃത്വം നിര്‍ദ്ദേശം നല്‍കുകയായിരുന്നു.എന്നാല്‍ പുനര്‍നിയമനഉത്തരവ് വന്ന ശേഷമേ പ്രതികരിക്കൂ എന്ന് സെന്‍കുമാര്‍ വ്യക്തമാക്കി

പന്ത്രണ്ട് ദിവസം മുന്‍പ്‌കോടതി സെന്‍കുമാറിനെ പുനര്‍നിയമിക്കാന്‍ ഉത്തരവ് നല്‍കിയിരുന്നതാണ്.എന്നാല്‍ ഉത്തരവ് നടപ്പാക്കാത്തതിനെതിരെ കോടതിയലക്ഷ്യത്തിന് സര്‍ക്കാരിനെതിരെ സെന്‍കുമാര്‍ വീണ്ടും കോടതിയെ സമീപിച്ചിരുന്നു.ഈ ഹര്‍ജിയില്‍ വാദം കേട്ട കോടതി സര്‍ക്കാരിനെ രൂക്ഷമായ ഭാഷയില്‍ വിമര്‍ശിച്ചുഉത്തരവ് നടപ്പാക്കിയില്ലെങ്കില്‍ എന്തു ചെയ്യണമെന്നറിയാമെന്ന് കോടതി പറഞ്ഞു.എന്നാല്‍ വിധിയില്‍ വ്യക്തത വരുത്തണമെന്നാവശ്യപ്പെട്ട് സര്‍ക്കാര്‍ സമര്‍പ്പിച്ച ഹര്‍ജി കോടതി തള്ളി.പുനര്‍നിയമനം പരിശോധിക്കണമെന്നാവശ്യപ്പെട്ട് സര്‍ക്കാര്‍ നല്‍കിയ ഹര്‍ജി ചൊവ്വാഴ്ച പരിഗണിക്കാനിരിക്കെയാണ് പുനര്‍നിയമിക്കാനുള്ള ഉത്തരവ് മുഖ്യമന്ത്രി പിണറായി വിജയന്‍ ഒപ്പിടുന്നത്.