‘ഇനി എല്ലാ മത്സരങ്ങളും കാണാന്‍ ഞാന്‍ ഉണ്ടാകും…’ ; മാധ്യമങ്ങളെ വെല്ലുവിളിച്ച് മല്യ..!

മാധ്യമങ്ങൾക്കെതിരെ രൂക്ഷ വിമർശനവുമായി വീണ്ടും വിജയ് മല്യ . ചാംപ്യൻസ് ട്രോഫി ക്രിക്കറ്റിൽ ഇന്ത്യ–പാക്കിസ്ഥാൻ മൽസരം കാണാനെത്തിയ തന്നെ പിടികിട്ടാപുള്ളിയായി പ്രഖ്യാപിച്ച് മാധ്യമങ്ങള്‍ ആഘോഷിച്ചതാണ് മല്യയെ ചൊടിപ്പിച്ചത്. ഇന്ത്യ–പാക്ക് മൽസരത്തിനിടെ വെളുത്ത കോട്ടണിഞ്ഞ് സ്‌റ്റേഡിയത്തിലെത്തിയ വിജയ് മല്യയായിരുന്നു ഇന്ത്യൻ മാധ്യമങ്ങളുടെ പ്രധാന ‘താരം’.

രാജ്യത്തെ വിവിധ ബാങ്കുകളിൽനിന്നും 9000 കോടിയോളം രൂപ വായ്പയെടുത്തു രാജ്യം വിട്ട മല്യ ഇപ്പോൾ ലണ്ടനിലാണ് കഴിയുന്നത്. മുൻപ് അദ്ദേഹത്തെ അറസ്റ്റ് ചെയ്തെങ്കിലും ഉടന്‍ തന്നെ ജാമ്യത്തിൽ വിടുകയായിരുന്നു. ഇന്ത്യ പിടികിട്ടാപ്പുള്ളിയായി പ്രഖ്യാപിച്ച മല്യ ലണ്ടനിൽ സുഖവാസം നയിക്കുകയാണെന്നുമായിരുന്നു റിപ്പോര്‍ട്ടുകള്‍. ഇന്ത്യ–പാക്ക് മൽസരം കാണാനെത്തിയ തന്റെ സാന്നിധ്യം വളരെ വികാരാവേശത്തോടു കൂടിയാണ് മാധ്യമങ്ങൾ നൽകിയത്. എന്നാല്‍ ഒരു കാര്യം പറയാം, എല്ലാ മൽസരങ്ങളിലും ടീം ഇന്ത്യയെ പ്രോൽസാഹിപ്പിക്കാൻ ഞാനെത്തുമെന്നും മല്യ തന്റെ ട്വിറ്ററിലൂ‍ടെ വ്യക്തമാക്കി.