നടിയും സുനിയും തമ്മില്‍ അടുപ്പം പുലര്‍ത്തിയിരുന്നുവെന്ന്‌ നടന്‍ ദിലീപ്‌

നടിയും പ്രതി പള്‍സര്‍ സുനിയും വളരെ അടുപ്പം പുലര്‍ത്തിയിരുന്നവരാണെന്നു നടന്‍ ദിലീപിന്റെ വെളിപ്പെടുത്തല്‍. സ്വകാര്യ ചാനല്‍ പരിപാടിയിലാണു ദിലീപ്‌ ഗുരുതരമായ ആരോപണം നടിക്കെതിരെ ഉന്നയിച്ചത്. അവര്‍ ഒരുമിച്ച്‌ ജോലി ചെയ്‌തിരുന്നതാണെന്നും ഇക്കാര്യം തന്നോടു സംവിധായകന്‍ ലാല്‍ പറഞ്ഞിട്ടുള്ളതാണെന്നും ദിലീപ്‌ വിശദമാക്കി. അവര്‍ നല്ല ഫ്രണ്ട്‌സായിരുന്നു . ഗോവയില്‍ ഒരുമിച്ചു പ്രവര്‍ത്തിച്ചിരുന്നു. അതാണ്‌ അപകടത്തിനു വഴിവച്ചത്‌.

താന്‍ ഒരിക്കലും ഇത്തരം ആള്‍ക്കാരുമായി കൂട്ടുകൂടാന്‍ ഉദ്ദേശിക്കുന്നില്ല. അതില്‍ വളരെ ശ്രദ്ധിക്കുന്നയാളാണ്‌. പള്‍സര്‍ സുനിയെ തന്റെ ഓര്‍മ്മയില്‍ കണ്ടിട്ടില്ല. തന്റെ ഇമേജ്‌ തകര്‍ക്കാനുള്ള ഗൂഢാലോചനയാണ്‌ ഇപ്പോള്‍ നടക്കുന്നത്‌. ആര്‍ക്കെങ്കിലും തന്നോടു പ്രശ്‌നമുണ്ടെങ്കില്‍ നേരിട്ട്‌ പറഞ്ഞോ, അഭിനയം നിര്‍ത്തി മാറി നില്‍ക്കാം. അതിന്‌ ഒരു മടിയുമില്ല. നടിക്ക്‌ അപകടം ഉണ്ടായതില്‍ വിഷമമുണ്ട്‌. തേജോവധം ചെയ്യുന്നവര്‍ക്കെതിരേ നിയമ നടപടി സ്വീകരിക്കും. താന്‍ ഏത്‌ അന്വേഷണത്തിനും തയ്യാറാണെന്ന് ദിലീപ് വ്യക്തമാക്കി.