കാലന്‍ റോഡ് അപകടം 120 : മരണം 27

കാസര്‍ഗോഡ് : കാഞ്ഞങ്ങാട്കാസര്‍കോട് കെ.എസ്.ടി.പി പാത നിര്‍മ്മാണത്തില്‍ അപാകതയോ. തുടര്‍ച്ചയായി മനുഷ്യ ജീവനുകള്‍ പൊലിഞ്ഞതോടെയാണ് ഇക്കാര്യത്തില്‍ പൊതുമരാമത്ത് വകുപ്പിലെ ഉന്നത ഉദ്യോഗസ്ഥര്‍ക്കും സംശയം ഉയര്‍ന്നിരിക്കുന്നത്.

കഴിഞ്ഞ ഒന്നര വര്‍ഷത്തെ കണക്കനുസരിച്ച് 27 ഈ മേഖലയില്‍ മാത്രം ജീവനാണ് റോഡില്‍ പൊലിഞ്ഞത്. കഴിഞ്ഞ രാത്രി ഉദുമ പള്ളത്ത് അമിതവേഗത്തിലെത്തിയ കാറിടിച്ച് ഗോപാലന്‍ എന്ന കാല്‍നടക്കാരന്‍ മരിച്ചതാണ് ഒടുവിലത്തെ സംഭവം. കഴിഞ്ഞവര്‍ഷം നോമ്പിന് പള്ളിക്കരയില്‍വെച്ചുണ്ടായ കാറപകടത്തില്‍ പിഞ്ചുകുട്ടികളടക്കം ഒരു കുടുംബത്തിലെ ആറുപേരാണ് മരിച്ചത്.

മെക്കാഡം രീതിയില്‍ പാതയുടെ പുനര്‍നിര്‍മാണം കഴിഞ്ഞ് ദിവസങ്ങള്‍ കഴിഞ്ഞാണ് അപകടമുണ്ടായത്. ആ വലിയ അപകടത്തിനുശേഷം 120ലധികം അപകടങ്ങളാണ് കെ.എസ്.ടി.പി പാതയിലുണ്ടായത്. ഒരേ ദിവസംതന്നെ മൂന്നില്‍ കൂടുതല്‍ അപകടങ്ങളുണ്ടായ ദിവസങ്ങള്‍വരെയുണ്ട്.

ഉദുമ പള്ളത്തും ഉദുമ ടൗണിലും ചാമുണ്ഡിക്കുന്നിലും ഒരേ ദിവസംതന്നെ അപകടങ്ങള്‍ സംഭവിച്ച് 50ലധികം പേര്‍ക്ക് പരിക്കേറ്റിരുന്നു. ആറു മാസത്തിനുള്ളില്‍ അഞ്ചുപേരാണ് ഉദുമ ടൗണില്‍നിന്നുതന്നെ അപകടത്തില്‍ മരിച്ചത്. വാഹനങ്ങളുടെ അമിത വേഗതയാണ് അപകടത്തിന് കൂടുതലും കാരണമാകുന്നത് എന്നു പറഞ്ഞ് കനത്ത നിയന്ത്രണങ്ങള്‍ വന്നെങ്കിലും അപകടം കുറഞ്ഞിട്ടില്ല. ഇവിടെ എത്തുമ്പോള്‍ പലപ്പോഴും വണ്ടിയുടെ നിയന്ത്രണം കയ്യില്‍ നിന്ന് നഷ്ടപ്പെടുന്നു എന്നാണ് അപകടത്തില്‍ നിന്ന് രക്ഷപെടുന്നവര്‍ പറയുന്നത്.

അപകടം നിത്യസംഭവമായി മാറിയതിനെ തുടര്‍ന്ന് കെ.എസ്.ടി.പി റോഡില്‍ അപകടം കുറക്കാന്‍ ഇന്റര്‍സെപ്റ്ററെത്തിയെങ്കിലും മരണനിരക്ക് കുറക്കാന്‍ കഴിഞ്ഞില്ല. അമിതവേഗത്തില്‍ സഞ്ചരിച്ച വാഹനങ്ങളില്‍നിന്ന് കഴിഞ്ഞ വര്‍ഷം ലക്ഷക്കണക്കിന് രൂപയാണ് പിഴയീടാക്കിയത്.

റോഡിനു കുറുകെ ബാരിക്കേഡ് സ്ഥാപിച്ചുവെങ്കിലും ബാരിക്കേഡ് ഇടിച്ചുതെറിപ്പിച്ച് അപകടമരണം സംഭവിച്ചിരുന്നു. കഴിഞ്ഞ വര്‍ഷം അവസാനം ഡി.സി.സി സെക്രട്ടറി വിദ്യാസാഗര്‍ ഓടിച്ച കാറിടിച്ച് പ്ലസ് വണ്‍ വിദ്യാര്‍ഥി മരിച്ചിരുന്നു.