ക്വട്ടേഷന്‍ കിട്ടിയത് ലഹരിമാഫിയയുമായി ബന്ധമുള്ള യുവനടി വഴി ; അഞ്ച് പേരുടെ അറസ്റ്റ് ഉടന്‍ ഉണ്ടായേക്കും

ലഹരിമാഫിയകളുമായി അടുത്ത ബന്ധമുള്ള നടി വഴിയാണ് നടിയെ ആക്രമിക്കാനുള്ള ക്വട്ടേഷന്‍ പള്‍സര്‍ സുനിക്ക് കിട്ടിയതെന്ന് റിപ്പോര്‍ട്ട്. നടിയെ ആക്രമിക്കുന്നതിനിടയില്‍ ക്വട്ടേഷന്‍ നല്‍കിയ ആളുടെ പേരിനൊപ്പം ഈ നടിയുടെ പേര് കൂടി സുനി പറഞ്ഞതായിട്ടാണ് പുറത്ത് വരുന്ന വിവരം. ഇവര്‍ ഉള്‍പ്പെടെ അഞ്ചു പേരുടെ അറസ്റ്റ് ഉടന്‍ ഉണ്ടായേക്കുമെന്നാണ് മാധ്യമ റിപ്പോര്‍ട്ട്.

നായികയായി ഏതാനും ഹിറ്റ് ചിത്രങ്ങളില്‍ മാത്രം പേരുള്ള ഈ നടി സഹനടി എന്ന നിലയില്‍ ഏറെ ശ്രദ്ധിക്കപ്പെടുകയും ചെയ്തിട്ടുണ്ട്. അതേസമയം കേസില്‍ പരാമര്‍ശിക്കുന്ന മാഡം ഈ നടിയല്ല എന്നും പറയുന്നുണ്ട്. ലഹരിമാഫിയയുമായി ബന്ധം പുലര്‍ത്തുന്ന ഈ നടിയാണ് അവസാന കണ്ണി.

തങ്ങളോട് സഹകരിച്ചില്ലെങ്കില്‍ ഒരു ഫ്‌ളാറ്റില്‍ കൊണ്ടുപോയി മയക്കുമരുന്ന് കുത്തിവെച്ച് കൂട്ട ബലാത്സംഗം ചെയ്യുമെന്ന്‌ സുനി നടിയെ ഭീഷണിപ്പെടുത്തിയിരുന്നു. പറഞ്ഞ ഫ്‌ളാറ്റ് ഈ നടിയുടേത് ആണെന്നാണ് കരുതുന്നത്. കേസില്‍ അനേകം പേരുകള്‍ പുറത്തു വന്നെങ്കിലും ഈ നടിയുടെ പേര് വരാതെ ചില കേന്ദ്രങ്ങള്‍ സൂക്ഷിക്കുകയായിരുന്നെന്നുമാണ് വിവരം.

നടിയെ ഇന്ന് ചോദ്യം ചെയ്‌തേക്കുമെന്നും സൂചനയുണ്ട്. ഇവര്‍ക്കൊപ്പമാണ് മറ്റൊരു യുവനടന്റെ കൂടി പേര് കേള്‍ക്കുന്നത്. കേസില്‍ അഞ്ചു പേരെ അറസ്റ്റ് ചെയ്യാന്‍ പോലീസ് തയ്യാറെടുക്കുകയാണെന്നും ഇവരോട് കൊച്ചി വിട്ടു പോകരുതെന്ന് ആവശ്യപ്പെട്ടതായും സൂചനയുണ്ട്.