വിവാഹ രജിസ്‌ട്രേഷനും ആധാര്‍ നിര്‍ബ്ബന്ധമാക്കുന്നു

വിവാഹ രജിസ്‌ട്രേഷനും ആധ്ര്‍ നിര്‍ബന്ധമാക്കാന്‍ നിയമ കമ്മീഷന്‍ ശുപാര്‍ശ ചെയ്തു.വിവാഹ തട്ടിപ്പും ഉപേക്ഷിക്കപ്പെടുന്ന സ്ത്രീകളുടെ ജീവനാംശം നല്‍കുന്നതുള്‍പ്പടെയുള്ള നടപടികള്‍ വേഗത്തിലാക്കുന്നതിനുമാണ് ഈ ശുപാര്‍ശ.

ജനനം, മരണം, വിവാഹം എന്നിവ രജിസ്റ്റര്‍ ചെയ്യുന്നത് നിര്‍ബന്ധമാക്കുന്നത് പഠിച്ച ജസ്റ്റിസ് ബി എസ് ചൗഹാന്‍ അദ്ധ്യക്ഷനായ സമിതിയുടെതാണ് ശുപാര്‍ശ. 30 ദിവസത്തിനുള്ളില്‍ വിവാഹം രജിസ്റ്റര്‍ ചെയ്യുന്നത് നിര്‍ബന്ധമാക്കണമെന്നും കമ്മീഷന്‍ ശുപാര്‍ശ ചെയ്തു. ഇത് സംബന്ധിച്ച് 270 പേജുള്ള റിപ്പോര്‍ട്ട് കമ്മിഷന്‍ നിയമമന്ത്രി രവി ശങ്കര്‍ പ്രസാദിന് സമര്‍പ്പിച്ചു.

വിവാഹം രജിസ്റ്റര്‍ ചെയ്യുന്നത് നിര്‍ബന്ധമാക്കാന്‍ 2006ല്‍ സുപ്രീം കോടതി ഉത്തരവിട്ടിരുന്നു. 2015ലെ ജനന മരണ രജിസ്‌ട്രേഷന്‍ നിയമ ഭേദഗതി നിയമം മൂലം ഇത് പര്യാപ്തമോണോ എന്നറിയാന്‍ നിയമ വകുപ്പ കമ്മീഷനോട് അഭിപ്രായം ചോദിച്ചിരുന്നു.

സീമയും അശ്വനി കുമാറും തമ്മിലുള്ള കേസ് പരിഗണിച്ചപ്പോഴാണ് വിവാഹം രജിസ്റ്റര്‍ ചെയ്യണമെന്ന് സുപ്രീം കോടതി ഉത്തരവിട്ടത്. മതാതീതമായി ഇക്കാര്യത്തില്‍ ഒരു നിയമം വേണമെന്നും കോടതി പറഞ്ഞിരുന്നു. ജനനം, മരണം, വിവാഹം എന്നിവ രജിസ്റ്റര്‍ ചെയ്യാന്‍ ഏകീകൃത മാര്‍ഗം വേണമെന്നും വിവാഹം രജിസ്റ്റര്‍ ചെയ്യുമ്‌ബോള്‍ ആധാര്‍ ലിങ്ക് ചെയ്യണമെന്നും കമ്മീഷന്‍ ശുപാര്‍ശ ചെയ്തു. നിരീക്ഷണങ്ങള്‍ എളുപ്പമാക്കാന്‍ ഇത് സഹായിക്കുമെന്നും കമ്മീഷന്‍ അഭിപ്രായപ്പെട്ടു.