നാലിടങ്ങളിലായി രണ്ടു ഘട്ടമായി ഗൂഢാലോചന ; അറസ്റ്റ് നാലു വര്‍ഷത്തെ തെളിവുകള്‍ കോര്‍ത്തിണക്കി

ദിലീപിന്റെ അറസ്റ്റ് ഗൂഢാലോചനയുടെ നാലു വര്‍ഷത്തെ തെളിവുകള്‍ കോര്‍ത്തിണക്കി . നാലിടങ്ങളിലായി രണ്ടു ഘട്ടമായാണ് ദിലീപ് പള്‍സര്‍ സുനിയുമായി ഗൂഢാലോചന നടത്തിയതെന്ന വിവരമാണ് അന്വേഷണസംഘത്തിനു ലഭിച്ചത്. ഹോട്ടലിലെ ബില്‍ മുതല്‍ സി.സി. ടിവി ദൃശ്യങ്ങള്‍ വരെ തെളിവുകളായി. പള്‍സര്‍ സുനിയും ദിലീപും തമ്മിലുള്ള ബന്ധം, നടിയുമായി ദിലീപിനുള്ള ശത്രുത, ഗൂഢാലോചനയില്‍ ദീലിപിന്റെ പങ്ക് എന്നിവ തെളിയിക്കുക എന്ന വെല്ലുവിളിയാണ് അന്വേഷണ ഉദ്യോഗസ്ഥര്‍ക്കു മുന്നിലുണ്ടായിരുന്നത്.

2013ല്‍ താരസംഘടന അമ്മ സംഘടിപ്പിച്ച ഷോയുടെ റിഹേഴ്‌സലിനിടെയാണു ഗൂഢാലോചന തുടങ്ങിയത്. നടിയും ദിലീപും തമ്മില്‍ കൊച്ചിയിലെ ഹോട്ടലില്‍ വാക്കുതര്‍ക്കമുണ്ടായി. ദിലീപ്-കാവ്യ ബന്ധം അന്നു ദിലീപിന്റെ ഭാര്യയായിരുന്ന മഞ്ജു വാര്യരെ അറിയിച്ചതായിരുന്നു പ്രകോപനം. നടി ആക്രമിക്കപ്പെട്ട വിവരം ദിലീപിനെ വിളിച്ചറിയിക്കാന്‍ നിര്‍മാതാവ് ആന്റോ ജോസഫ് വിളിച്ച ഫോണ്‍കോള്‍ 12 സെക്കന്‍ഡില്‍ ദിലീപ് കട്ട് ചെയ്തു.

വിവരമറിഞ്ഞ് നടിയുടെ അടുത്ത് ആദ്യമെത്തിയവരില്‍ ഒരാളായിരുന്നു ആന്റോ ജോസഫ്. ഇത്രയും ഗൗരവമായ ഒരു വിഷയം ആദ്യമായി കേള്‍ക്കുന്ന ആരും 12 സെക്കന്‍ഡില്‍ കോള്‍ കട്ടാക്കില്ലെന്ന ബോധ്യം ദിലീപിനെ സംശയിക്കാന്‍ ഇടയാക്കി. നടി ആക്രമിക്കപ്പെട്ട വിവരം രാവിലെ ഒമ്പതിനാണ് അറിഞ്ഞതെന്നായിരുന്നു ദിലീപിന്റെ ആദ്യ മൊഴി. എന്നാല്‍ ഇക്കാര്യം നേരത്തേതന്നെ ആന്റോ ജോസഫ് ദീലിപിനെ വിളിച്ച് അറിയിച്ചിരുന്നു. പോലീസ് ആന്റോ ജോസഫിനെ ചോദ്യം ചെയ്ത് ഇതുസംബന്ധിച്ച് വ്യക്തത വരുത്തിയിട്ടുണ്ട്. 2013 ല്‍ നല്‍കിയ ക്വട്ടേഷനാണിതെന്ന മട്ടില്‍ നേരത്തേ വാര്‍ത്തകള്‍ പുറത്തുവന്നിരുന്നു.