അമിത് ഷായുടെ സ്വത്തില്‍ 300% വര്‍ദ്ധന, സ്മൃതി ഇറാനിക്ക് ബിരുദമില്ല !

ബിജെപി അധ്യക്ഷന്‍ അമിത് ഷായുടെ സ്വത്തില്‍ മൂന്നിരട്ടിയുടെ വര്‍ദ്ധന. കേന്ദ്ര മന്ത്രി സ്്മൃതി ഇറാനി ബിരുദധാരിയല്ലെന്നും വ്യക്തമായി. രാജ്യസഭ തിരഞ്ഞെടുപ്പിനുള്ള നാമനിര്‍ദ്ദേശ പത്രികയിലാണ് ഇക്കാര്യങ്ങള്‍ വെളിപ്പെടുത്തിയിട്ടുള്ളത്. ഗുജറാത്തില്‍ നിന്നാണ് ഇരുവരും നാമനിര്‍ദ്ദേശ പത്രിക സമര്‍പ്പിച്ചത്.

2012 നിയമസഭ തിരഞ്ഞെടുപ്പില്‍ മത്സരിക്കുമ്പോള്‍ ആകെ സ്വത്ത് 11.15 കോടിയെന്നാണ് കാണിച്ചിരുന്നത്. ഇപ്പോള്‍ 34 കോടി രൂപയായി. കടവും കുറഞ്ഞു. സ്മൃതി ഇറാനിയുടെ സത്യവാങ്മൂലത്തില്‍ ബികോം പൂര്‍ത്തിയാക്കിയിട്ടില്ലെന്നുമുണ്ട്. കഴിഞ്ഞ ലോക്‌സഭ തിരഞ്ഞെടുപ്പ് കഴിഞ്ഞപ്പോള്‍ സ്മൃതി ഇറാനിയുടെ വിദ്യാഭ്യാസ യോഗ്യത വിവാദമായിരുന്നു. അന്ന് ഡല്‍ഹി സര്‍വ്വകലാശാല ബികോം ബിരുദമെന്നാണ് സത്യവാങ്മൂലത്തില്‍ രേഖപ്പെടുത്തിയിരിക്കുന്നത്.

എക്കണോമിക്കല്‍ ആന്റ് പൊളിറ്റിക്കല്‍ വീക്ക്‌ലിയാണ് നേതാക്കളുടെ സ്വത്ത് സമ്പാദനത്തെക്കുറിച്ച് പുറത്തു വിട്ടത്. എന്നാല്‍ റിപ്പോര്‍ട്ട് വന്നതിന് തൊട്ടു പുറകേ മാധ്യമത്തിന് മേല്‍ ഉന്നതരുടെ സമ്മര്‍ദ്ധമുണ്ടാകുകയും വാര്‍ത്ത പിന്‍വലിക്കുകയും എഡിറ്ററെ പുറത്താക്കുകയും ചെയ്തു.