ഡി സിനിമാസ് പുറമ്പോക്ക് ഭൂമി കയ്യേറിയിട്ടില്ല

ദിലീപിന്റെ ഉടമസ്ഥതയിലുള്ള ചാലക്കുടിയിലെ ഡിസിനിമാസ് ഭൂമി കയ്യേറിയെന്ന ആരോപണത്തില്‍ ദിലീപിന് അനുകൂല വിധി. ഡി സിനിമാസ് ഭൂമി കയ്യേറിയിട്ടില്ലെന്ന് സര്‍വ്വേ വിഭാഗം കണ്ടെത്തി. കഴിഞ്ഞ 30 വര്‍ഷത്തെ രേഖകളുടെ അടിസ്ഥാനത്തില്‍ ഇന്ന് റിപ്പോര്‍ട്ട് സമര്‍പ്പിക്കും. ഇതിലും പഴയ രേഖകള്‍ ലഭ്യമല്ല. സമീപത്തെ ക്ഷേത്രത്തിന് ഇനിയും പരാതിയുണ്ടെങ്കില്‍ അവരുടെ കൈവശമുള്ള പഴയ രേഖകള്‍ സമര്‍പ്പിക്കണം. നിലവില്‍ രേഖകള്‍ പ്രകാരമാണ് ഡി സിനിമാസ് ഭൂമി ദിലീപ് സ്വന്തമാക്കിയത്. പല തവണ കൈമാറ്റം ചെയ്യപ്പെട്ട ഭൂമിയാണ് ദിലീപിന്റെ കയ്യിലെത്തിയത്. ഏഴു തവണയെങ്കിലും കൈമാറ്റം നടന്നതായാണ് സൂചന.

ലഭ്യമായ രേഖകളുടെ അടിസ്ഥാനത്തില്‍ തിയറ്ററിന്റെ ഭൂമിയില്‍ പുറമ്പോക്ക് ഇല്ലെന്ന് കണ്ടെത്തി. കൂടുതല്‍ കൃത്യതയ്ക്കായ് ഇത്തവണ യന്ത്രമുപയോഗിച്ചാണ് അളന്നത്. വില്ലേജ് ഓഫീസറുടെ നേതൃത്വത്തില്‍ മൂന്നു വര്‍ഷം മുന്‍പ് ഭൂമി അളന്നതിനെക്കുറിച്ച് പരാതിയുയര്‍ന്നിരുന്നു. തുടര്‍ന്ന് അന്നത്തെ കളക്ടര്‍ എംഎസ് ജയ സര്‍വേ വിഭാഗത്തെ വീണ്ടും അളവെടുപ്പിന് നിയോഗിച്ചു.