കെഎസ്ആര്‍ടിസി വരുമാനം വര്‍ദ്ധിച്ചുവെന്ന് എംഡി രാജമാണിക്യം

കെഎസ്ആര്‍ടിസി വരുമാനത്തില്‍ ഒന്നേമുക്കാന്‍ കോടി രൂപയുടെ വര്‍ദ്ധനയുണ്ടായതായി എംഡി രാജമാണിക്യം. ഡ്യൂട്ടി പരിഷ്‌കരണം കാരണമാണ് വരുമാനം വര്‍ദ്ധിച്ചത്. നാലരക്കോടി രൂപയായിരുന്ന വരുമാനം ഇപ്പോള്‍ ആറേകാല്‍ കോടി രൂപയായി വര്‍ദ്ധിച്ചുവെന്നും എംഡി പറഞ്ഞു. വിദ്യാര്‍ത്ഥികള്‍ക്ക് നല്‍കുന്ന കണ്‍സഷന്‍ കാര്‍ഡിന്റെ പ്രോസസിങ് ഫീസ് ഈടാക്കുന്നത് മുന്‍ തീരുമാനപ്രകാരമാണെന്നും എംഡി കൂട്ടിച്ചേര്‍ത്തു.

ജൂലൈ 15നാണ് ഡബിള്‍ ഡ്യൂട്ടി സമ്പ്രദായം പരിഷ്‌കരിച്ച് ഒന്നര ഡ്യൂട്ടിയാക്കിയത്. പുതിയ ഉത്തരവ് പ്രകാരം ജോലിസമയം 13 മണിക്കൂര്‍ ആണെങ്കില്‍ മാത്രമേ ഡബിള്‍ ഡ്യൂട്ടി അനുവദിക്കൂ. യാത്രയ്ക്കിടയിലെ വിശ്രമ സമയവും ഭക്ഷണ സമയവും കോര്‍പ്പറേഷന്റെ ഡ്യുട്ടി സമയത്തില്‍ ഉള്‍പ്പെടുന്നതല്ല.

സ്ഥിര അവധികള്‍ ഉള്‍പ്പെടെ 13 ദിവസമായിരുന്നു ഒരു ജീവനക്കാരന്റെ ഡ്യൂട്ടി. എന്നാല്‍ പുതിയ പരിഷ്‌കാരം നിലവില്‍ വന്നതോടെ നാല് ദിവസം അധികം ജോലി ചെയ്യണം. വിദ്യാര്‍ത്ഥികള്‍ക്കുള്ള കണ്‍സഷന്‍ കാര്‍ഡിന്റെ പ്രോസസിങ് ഫീസ് 10 രൂപയില്‍ നിന്നും 100 രൂപയായാണ് വര്‍ദ്ധിപ്പിച്ചത്.