ചികിത്സ നിഷേധിച്ച സംഭവം: നാല് ആശുപത്രികള്‍ക്കെതിരെ കേസ്

കൊല്ലത്ത്‌ വാഹനാപകടത്തില്‍ പെട്ടയാള്‍ ചികിത്സ ലഭിക്കാതെ മരിക്കാനിടയായ സംഭവത്തില്‍ നാല് ആശുപത്രികള്‍ക്കെതിരെ മനുഷ്യാവകാശ കമ്മീഷന്‍ കേസെടുത്തു. കൊല്ലം മെഡിസിറ്റി, കൊല്ലം മെഡിട്രീന, കൊട്ടിയം കിംസ്, തിരുവനന്തപുരം മെഡിക്കല്‍ കോളജ് എന്നീ ആശുപത്രികള്‍ക്കെതിരെയാണ് കേസ്. വാഹനാപകടത്തില്‍പെട്ട് ഗുരുതരാവസ്ഥയിലായ തമിഴ്‌നാട് സ്വദേശി മുരുകന്‍ (47) ചികിത്സ ലഭിക്കാതെ ഏഴു മണിക്കൂറോളം കിടന്ന ശേഷം ഇന്നു പുലര്‍ച്ചെ മരിച്ചു.

മുരുകന്‍ സഞ്ചരിച്ച ബൈക്കില്‍ കാറിടിച്ചായിരുന്നു അപകടം. ഞായറാഴ്ച രാത്രി 11 മണിയോടെ അപകടത്തില്‍പെട്ട് റോഡില്‍ കിടന്ന മുരുകനെ ആദ്യം കൊല്ലം മെഡിസിറ്റി ആശുപത്രിയില്‍ ആണ് എത്തിച്ചത്. വെന്റിലേറ്റര്‍ ഇല്ലെന്നും കൂട്ടിരിപ്പുകാര്‍ ഇല്ലെങ്കില്‍ പ്രവേശിപ്പിക്കാന്‍ കഴിയില്ലെന്നും പറഞ്ഞ് മടക്കി അയച്ചു. ഇതോടെ ഇയാളെ തിരുവനന്തപുരം മെഡിക്കല്‍ കോളജില്‍ കൊണ്ടുചെന്നുവെങ്കിലും വെന്റിലേറ്റര്‍ ഇല്ലെന്ന് കാണിച്ച് മടക്കി. കൊല്ലത്തെ രണ്ട് സ്വകാര്യ ആശുപത്രികളില്‍ കൂടി കയറിയിറങ്ങി. ഇതിനിടെ ആംബുലന്‍സില്‍ കിടന്ന് മുരുകന്‍ മരിക്കുകയായിരുന്നു.