“ഡയാനയെ കൊലപ്പെടുത്തിയതാണെന്ന്‌ ബ്രിട്ടീഷ്‌ പോലീസ്‌ പറഞ്ഞു..” : വെളിപ്പെടുത്തലുമായി ഡ്രൈവറുടെ പിതാവ്‌

ഡയാന രാജകുമാരിയെ കൊലപ്പെടുത്തിയതാണെന്നു ബ്രിട്ടീഷ്‌ പോലീസ്‌ തന്നോടു പറഞ്ഞതായി അപകടത്തില്‍ മരിച്ച ഡ്രൈവറുടെ പിതാവിന്റെ വെളിപ്പെടുത്തല്‍. കാര്‍ ഓടിച്ചിരുന്ന മകന്‍ നഷ്‌ടപ്പെട്ടത്‌ ആകസ്‌മികമായാണെന്നും ഇതിന്റെ ചുരുള്‍ അഴിയുന്നതിനു മുമ്പു താന്‍ മരിച്ചേക്കുമെന്നും ഡയാനയുടെ ഡ്രൈവര്‍ ഹെന്‍ട്രി പോളിന്റെ പിതാവ്‌ പോള്‍(85) ഒരു അഭിമുഖത്തില്‍ പറഞ്ഞു. പാരീസിലെ റിറ്റ്‌സ്‌ ഹോട്ടലിന്റെ സുരക്ഷാവിഭാഗം മേധാവിയാണ്‌ ഇദ്ദേഹം.

1997 ഓഗസ്‌റ്റ്‌ 31 നാണു ഡയാന സഞ്ചരിച്ച മെഴ്‌സിഡസ്‌ കാര്‍ അല്‍മാ തുരങ്കത്തിലുണ്ടായ അപകടത്തില്‍പ്പെട്ടത്‌. കാറിലുണ്ടായിരുന്ന ഡോദി അല്‍ഫയദും മരിച്ചിരുന്നു. "ഇത്‌ ആസുത്രിതമായി നടത്തിയ കൊലപാതകമാണ്‌. ഇതില്‍ മകനു പങ്കില്ലെന്ന്‌ എനിക്കു നൂറുശതമാനം ഉറപ്പുണ്ട്‌. അവര്‍ വളരെ ആദരണീയനും സത്യസന്ധനുമായിരുന്നു. ഭരണകൂടമാണു കൊലപാതകത്തിനു പിന്നിലുള്ളത്‌". സംഭവത്തെക്കുറിച്ച്‌ ഔദ്യോഗിക അന്വേഷണം നടത്തിയെങ്കിലും മദ്യപിച്ചു വാഹനമോടിച്ച മകന്റെ കുഴപ്പംകൊണ്ടാണ്‌ അപകടമെന്നാണു കണ്ടെത്തലെന്ന്‌ അദ്ദേഹം പറഞ്ഞു. ഇതു കൊലപാതകമാണെന്ന്‌ അറിയാവുന്നവര്‍ സ്‌കോട്ട്‌ലന്‍ഡ്‌ യാര്‍ഡിലുണ്ടെന്ന്‌ ഡെയ്‌ലിമിററിനു നല്‍കിയ അഭിമുഖത്തില്‍ അദ്ദേഹം അവകാശപ്പെട്ടു. ."എന്താണു സംഭവിച്ചതെന്ന്‌ യഥാര്‍ഥത്തില്‍ അറിയാനാകുമെന്ന പ്രതീക്ഷയില്ല. ചിലപ്പോള്‍ മുപ്പതോ അന്‍പതോ വര്‍ഷം കഴിയുമ്പോള്‍ സത്യം പുറത്തു വരാം. മരിക്കുന്നതിനു മുമ്പ്‌ അറിയണമെന്ന്‌ ആഗ്രഹമുണ്ട്‌. അതു സംഭവിക്കുമെന്നു കരുതുന്നില്ല"-അദ്ദേഹം പറഞ്ഞു.