ദിലീപിനെ രണ്ടാം പ്രതിയാക്കി കുറ്റപത്രം ; ദിലീപ് ഇന്ന് സമര്‍പ്പിക്കുന്ന ജാമ്യാപേക്ഷയെ ശക്തമായി എതിര്‍ക്കാനും പോലീസ് തീരുമാനം !

നടിയെ ആക്രമിക്കപ്പെട്ട കേസില്‍ ദിലീപിനെ രണ്ടാം പ്രതിയാക്കിക്കൊണ്ടു പോലീസ്‌ കുറ്റപത്രം തയ്യാറാക്കുന്നു. എത്രയും വേഗം കുറ്റപത്രം സമര്‍പ്പിക്കാനിരിക്കുന്ന അനേഷണസംഘം ദിലീപിനെ രണ്ടാം പ്രതിയാക്കിയേക്കുമെന്നാണ് സൂചന. കേസില്‍ രണ്ട് അറസ്റ്റുകള്‍ കൂടി ഉണ്ടായേക്കുമെന്ന് റിപ്പോര്‍ട്ടുണ്ട്.

കേസില്‍ ഒന്നാം പ്രതി പള്‍സര്‍ സുനിയും രണ്ടാം പ്രതി ദിലീപുമാണ്. തൊണ്ടിമുതലായ ഫോണ്‍ നശിപ്പിച്ചതിന് അഭിഭാഷകരില്‍ ഒരാള്‍ കൂടി പ്രതിചേര്‍ത്തേക്കും. പെരുമ്പാവൂര്‍ ജിഷാ വധക്കേസില്‍ കുറ്റപത്രം തയ്യാറാക്കിയ പ്രത്യേക അന്വേഷണസംഘമാണ് ഈ കേസിലും കുറ്റപത്രം തയ്യാറാക്കുന്നത്. ശാസ്ത്രീയ തെളിവുകള്‍ കൂടി അടിസ്ഥാനപ്പെടുത്തിയിട്ടുണ്ട്. ഈ ഘട്ടത്തില്‍ കേസില്‍ ആദ്യം മുതല്‍ പറഞ്ഞു കേട്ട മാഡത്തിന് വേണ്ടി അന്വേഷിച്ച് വിലപ്പെട്ട സമയം കളയേണ്ടെന്നാണ് തീരുമാനം. കേസില്‍ നേരത്തേ ദുബായ് കേന്ദ്രീകരിച്ചുള്ള ഒരു ഗൂഡാലോചനയെക്കുറിച്ചു പരാമര്‍ശം വന്നിരുന്നു. അതും വിട്ടേക്കും.

അതിനിടയില്‍ ദിലീപ് ഇന്ന് ഹൈക്കോടതിയില്‍ പുതിയതായി സമര്‍പ്പിക്കുന്ന ജാമ്യാപേക്ഷയെ ശക്തമായി എതിര്‍ക്കാനും പോലീസ് തീരുമാനിച്ചിട്ടുണ്ട്. കേസില്‍ കൂടുതല്‍ അന്വേഷണം ആവശ്യമാണെന്ന് പറഞ്ഞായിരിക്കും പോലീസ് ജാമ്യാപേക്ഷയെ എതിര്‍ക്കുക. ദിലീപിന്റെ മുന്‍ അഭിഭാഷകന്‍ കെ. രാംകുമാര്‍ നല്‍കിയ ജാമ്യാപേക്ഷ പരിഗണിച്ച അതേ ബെഞ്ചിനു മുമ്പാകെയാണ് വീണ്ടും അപേക്ഷ സമര്‍പ്പിക്കുക.