ദോക് ലാമില്‍ ചൈന സൈനിക ശക്തി വര്‍ധിപ്പിക്കുന്നതായി റിപ്പോര്‍ട്ട് ; ജനങ്ങളോട് ഗ്രാമം ഒഴിഞ്ഞു പോകാന്‍ ഇന്ത്യന്‍ സൈന്യം ആവശ്യപ്പെട്ടു

ദോക് ലാമില്‍ ചൈന സൈനിക ശക്തി വര്‍ധിപ്പിക്കുന്നതായി റിപ്പോര്‍ട്ട്. ഇന്ത്യ, ചൈന, ഭൂട്ടാന്‍ എന്നീ രാജ്യങ്ങളുടെ അതിര്‍ത്തികള്‍ സംഗമിക്കുന്നത് ദോക് ലാമിലാണ്‌. ഇവിടെ ഏഴാമത്തെ ആഴ്ചയാണ് ഇന്ത്യയുടെയും ചൈനയുടെയും സൈനികര്‍ മുഖാമുഖം നില്‍ക്കുന്നത്.

മുന്നൂറോളം ചൈനീസ് സൈനികര്‍ ദോക് ലാം മേഖലയില്‍ ഇന്ത്യന്‍ സൈനികരുമായി മുഖാമുഖം നില്‍ക്കുന്നുവെന്നുമുണ്ട്. 53 ഇന്ത്യന്‍ സൈനികരും ബുള്‍ഡോസറുകളും തങ്ങളുടെ അതിര്‍ത്തിക്കുള്ളിലുണ്ടെന്നു ചൈനീസ് വിദേശകാര്യമന്ത്രാലയം അവകാശപ്പെട്ടു. മേഖലയില്‍ 30 ടെന്റുകളിലായി 350 ഇന്ത്യന്‍ സൈനികരെയാണു വിന്യസിച്ചിട്ടുള്ളത്. ദോക് ലാ മേഖലയ്ക്കു സമീപമുള്ള ജനങ്ങളോട് ഗ്രാമം ഒഴിഞ്ഞു പോകാന്‍ സൈന്യം ആവശ്യപ്പെട്ടുണ്ട്.

ദോക് ലാമില്‍ നിന്നും 35 കിലോമീറ്റര്‍ അകലെയുള്ള നതാങ് എന്ന ഗ്രാമത്തിലെ ജനങ്ങളോടാണ് എത്രയും വേഗം വീടുകള്‍ ഒഴിയാന്‍ സൈന്യം ആവശ്യപ്പെട്ടിരിക്കുന്നത്. നൂറുകണക്കിനാളുകള്‍ ഇതേത്തുടര്‍ന്ന് സുരക്ഷിത കേന്ദ്രങ്ങളിലേക്കു മാറി. ദോക് ലാം ചൈനയുടേതാണെന്നു പറഞ്ഞിട്ടില്ലെന്നു ഭൂട്ടാന്‍ വ്യക്തമാക്കി.