ഗുര്‍മീതിന്റെ വിധി: പഞ്ച്കുല സംഘര്‍ഷഭരിതം ; കലാപത്തില്‍ 11 മരണം

ബലാത്സംഗക്കേസില്‍ ആള്‍ദൈവം ഗുര്‍മീത് റാം റഹീം സിംഗ് കുറ്റക്കാരനാണെന്ന് വിധി വന്നതോടെ പഞ്ച്കുല പ്രത്യേക സി.ബി.ഐ കോടതി പരിസരം സംഘര്‍ഷഭരിതം. സംഘര്‍ഷത്തില്‍ 11 പേര് മരിച്ചെന്ന് റിപ്പോര്‍ട്ട്. കോടതി പരിസരത്ത് തടിച്ചുകൂടിയ അനുയായികള്‍ സംഘര്‍ഷത്തിലേക്ക് നീങ്ങിയതോടെ സൈന്യം ജനക്കൂട്ടത്തിന് നേര്‍ക്ക് കണ്ണീര്‍വാതകവും ജലപീരങ്കിയും പ്രയോഗിച്ചു.

കലാപത്തിന് സാധ്യതയുണ്ടെന്ന മുന്നറിയിപ്പിനെ തുടര്‍ന്ന് 53 കമ്പനി സൈന്യത്തെയും ഹരിയാന പോലീസിലെ 50,000 ഓളം ഉദ്യോഗസ്ഥരെയുമാണ് വിന്യസിച്ചിരിക്കുന്നത്. പഞ്ചാബ്, ഹരിയാന, ചണ്ഡിഗഢ്, രാജസ്ഥാന്റെ ചില ഭാഗങ്ങള്‍ എന്നിവിടങ്ങളില്‍ 72 മണിക്കൂര്‍ നേരത്തേക്ക് മൊബൈല്‍, ഇന്റര്‍നെറ്റ്, വൈദ്യുതി ബന്ധങ്ങള്‍ വിഛേദിച്ചു.

പഞ്ച്കുലയില്‍ പോലീസുകാര്‍ക്കും മാധ്യമ പ്രവര്‍ത്തകര്‍ക്കും നേരെ ദേര സച്ച സൗദ പ്രവര്‍ത്തകര്‍ ആക്രമണം അഴിച്ചുവിട്ടു. മാധ്യമങ്ങളുടെ ഒബി വാനുകളും വാഹനങ്ങളും കത്തിച്ചു. പോലീസ് സ്‌റ്റേഷനുകള്‍ക്കും റെയില്‍വേ സ്‌റ്റേഷനുകള്‍ക്കും തീവച്ചതായും സ്ഥിരീകരിക്കാത്ത റിപ്പോര്‍ട്ടുണ്ട്. പഞ്ചാബിലെ ബതിന്ദ, മന്‍സ, ഫിറോസ്പുര്‍ എന്നിവിടങ്ങളില്‍ കര്‍ഫ്യൂ പ്രഖ്യാപിച്ചു. പഞ്ചാബിലെ റെയില്‍വേ സ്‌റ്റേഷനുകളിലും പെട്രോള്‍ പമ്പുകളിലും ഗുര്‍മീത് അനുയായികള്‍ തീയിട്ടതായും റിപ്പോര്‍ട്ടുണ്ട്.