ഹാര്‍വി ചുഴലി ആഞ്ഞടിച്ചു:ഹൂസ്റ്റണില്‍ കനത്ത വെള്ളപ്പൊക്കം: മലയാളികള്‍ ദുരിതത്തില്‍

ഹാര്‍വി ചുഴലിക്കാറ്റ് ആഞ്ഞടിച്ചതിനെ തുടര്‍ന്നുണ്ടായ പേമാരിയിലും വെള്ളപ്പൊക്കത്തിലും ഹൂസ്റ്റണ്‍ നിവാസികള്‍ ദുരിതക്കയത്തില്‍.മലയാളികള്‍ ഏറെയുള്ള ഹൂസ്റ്റണില്‍ സ്ഥിതിതിഗതികള്‍ ഇതു വരെ നിയന്ത്രണ വിധേയമല്ല.നദികളും തടാകങ്ങളും കരകവിഞ്ഞ് ഒഴുകുകയാണ്.രണ്ട് അണക്കെട്ടുകളും നിറഞ്ഞ് കവിഞ്ഞത് അപകടഭീഷണി വര്‍ദ്ധിപ്പിച്ചിട്ടുണ്ട്.

താമസകേന്ദ്രങ്ങളിലേക്ക് പാമ്പും ചീങ്കണ്ണിയുമുള്‍പ്പടെയുള്‌ള ഇഴജന്തുക്കള്‍ കയറിവരുന്നതായി മലയാളികള്‍ മാധ്യമങ്ങളോട് പറഞ്ഞു.

പലരും ദിവസങ്ങളായി വീടിനു പുറത്തിറങ്ങാനാകാത്ത അവസ്ഥയിലാണ്. ശേഖരിച്ചു വച്ച ഭക്ഷണവും തീരാറായി. റോഡുകളെല്ലാം തകര്‍ന്നു. ജോര്‍ജ് ബുഷ്, ഹോബി വിമാനത്താവളങ്ങള്‍ അടച്ചിട്ടിരിക്കുകയാണ്. വിമാനത്താവളങ്ങളില്‍ 25 അടിയോളം വെള്ളമുണ്ട്. ഗതാഗതമാര്‍ഗങ്ങളെല്ലാം അടഞ്ഞതോടെ ഹൂസ്റ്റണ്‍ ഒറ്റപ്പെട്ടു. അതേസമയം എത്രയും വേഗം രക്ഷാബോട്ടുകളില്‍ ദുരിതാശ്വാസ ക്യാംപുകളിലേക്കു മാറണമെന്നു മലയാളികള്‍ ഉള്‍പ്പെടെയുള്ളവര്‍ക്ക് അധികൃതര്‍ നിര്‍ദേശം നല്‍കിയിട്ടുണ്ട്. താമസസ്ഥലങ്ങള്‍ നഷ്ടമായവര്‍ക്ക് ഇന്ത്യക്കാരുടെ വ്യവസായ സ്ഥാപനങ്ങളിലും ആരാധനാലയങ്ങളിലും താമസിക്കാന്‍ അവസരം ഒരുക്കുന്നുണ്ട്.