നടിയെ ആക്രമിച്ച കേസ് : നാദിര്‍ഷാ മുന്‍കൂര്‍ ജാമ്യം തേടി

നടിയെ ആക്രമിച്ച കേസില്‍ സംവിധായകന്‍ നാദിര്‍ ഷാ ഹൈക്കോടതിയില്‍ മുന്‍കൂര്‍ ജാമ്യാപേക്ഷ നല്‍കി. നാദിര്‍ ഷായെ വീണ്ടും ചോദ്യം ചെയ്യാന്‍ പോലീസ് വിളിപ്പിച്ചതിനു പിന്നാലെയാണ് ഇന്ന് മുന്‍കൂര്‍ ജാമ്യാപേക്ഷ നല്‍കിയത്. മുന്‍പ് പല തവണ താന്‍ പോലീസിന്റെ ചോദ്യം ചെയ്യലിന് വിധേയമായതാണെന്നും മണിക്കൂറുകള്‍ തന്നെ ചോദ്യം ചെയ്തു. പോലീസുമായി പൂര്‍ണ്ണമായും സഹകരിച്ചിരുവെന്നും നാദിര്‍ ഷാ ജാമ്യാപേക്ഷയില്‍ പറയുന്നു.

ക്രിമിനല്‍ നടപടിചട്ടം പൂര്‍ണ്ണമായും ലംഘിച്ചുള്ള അന്വേഷണമാണ് കേസില്‍ പോലീസ് നടത്തുന്നത്. മുന്‍പ് തന്നെ ചോദ്യം ചെയ്ത വിവരങ്ങളൊന്നും പോലീസ് കോടതിയില്‍ സമര്‍പ്പിച്ചിട്ടില്ല. കേസില്‍ ദിലീപിനെതിരായും പ്രോസിക്യൂഷന് അനുകൂലമായും മൊഴി നല്‍കാന്‍ തനിക്ക് മേല്‍ പോലീസ് ശക്തമായ സമ്മര്‍ദ്ദം നടത്തുന്നു. പോലീസിന്റെ സമ്മര്‍ദ്ദം തനിക്ക് താങ്ങാന്‍ കഴിയുന്നതിന് അപ്പുറമാണ്. മുന്‍കൂര്‍ ജാമ്യാപേക്ഷ നല്‍കിയാല്‍ അറസ്റ്റു ചെയ്യുമെന്നും പോലീസ് ഭീഷണിപ്പെടുത്തിയിട്ടുണ്ടെന്നും നാദിര്‍ ഷാ ജാമ്യാപേക്ഷയില്‍ പറയുന്നു.