പ്രായപൂര്‍ത്തിയാകാത്ത പെണ്‍കുട്ടികളെ വിവാഹം ചെയ്യാനെത്തിയ അറബിസംഘം പിടിയില്‍

പ്രായപൂര്‍ത്തിയാകാത്ത പെണ്‍കുട്ടികളെ വിവാഹം ചെയ്യാനെത്തിയ അറബ് ഷെയ്ഖുമാരുള്‍പ്പെടെയുള്ള വിവാഹ റാക്കറ്റിനെ ഹൈദരാബാദ് പോലീസ് അറസ്റ്റ് ചെയ്തു. അഞ്ച് ഒമാന്‍ സ്വദേശികളും മൂന്ന ഖത്തര്‍ സ്വദേശികളുമുള്‍പ്പെട്ട 8 അംഗ സംഘത്തേയാണ് പിടികൂടിയത്.

കഴിഞ്ഞ മാസം പ്രായപൂര്‍ത്തിയാകാത്ത പെണ്‍കുട്ടിയെ വിവാഹം ചെയ്ത ഒമാന്‍ പൗരന്‍ അറസ്റ്റിലായതോടെയാണ് ഇത്തരം വിവാഹ റാക്കറ്റിനെക്കുറിച്ചുള്ള കൂടുതല്‍ വിവരം പോലീസിന് ലഭിക്കുന്നത്. തുടര്‍ന്ന് ഹൈദരാബാദ് വിമാനത്താവളം വഴിയെത്തുന്ന അറബ് വംശജര്‍ പോലീസിന്റെ നിരീക്ഷണത്തിലായിരുന്നു. അറബികള്‍ക്ക് പെണ്‍കുട്ടികളെ എത്തിച്ചു കൊടുക്കുന്ന ഏജന്റുമാരും പിടിയിലായി. ഇത്തരം വിവാഹങ്ങള്‍ സര്‍ട്ടിഫിക്കറ്റ് ഒരുക്കി നല്‍കിയിരുന്ന ഖാസി ഫരീദ് അഹമ്മദ് എന്ന മുംബൈ സ്വദേശിയെയും അറസ്റ്റ് ചെയ്തു. ഓരോ സര്‍ട്ടിഫിക്കറ്റിനും ഇയാള്‍ 50000 രൂപ വീതം വാങ്ങിയിരുന്നു. ഊന്നു വടിയുടെ സഹായത്താല്‍ നടക്കുന്ന 80കാരന്‍ ഷെയ്ഖും പ്രായപൂര്‍ത്തിയാകാത്ത കുട്ടികളെ തേടിയെത്തിയത് പോലീസിനെപ്പോലും ഞെട്ടിച്ചു. പോലീസ് സംഘം ഗസ്റ്റ് ഹൗസില്‍ എത്തുമ്പോള്‍ ഇവര്‍ അനുയോജ്യരായവരെ തിരഞ്ഞെടുക്കാന്‍ പെണ്‍കുട്ടികളെ അഭിമുഖം ചെയ്യുകയായിരുന്നു.