ഗൗരി ലങ്കേഷ് വധക്കേസ്:പ്രതികളെന്നു സംശയിക്കുന്നവരുടെ രേഖാ ചിത്രം പുറത്തുവിട്ടു

ബാംഗ്ലൂര്‍:പ്രശസ്ത മാധ്യമപ്രവര്‍ത്തകയും ആക്ടിവിസ്റ്റുമായഗൗരി ലങ്കേഷിന്റെ കൊലപാതകത്തില്‍ പ്രതികളെന്നു സംശയിക്കുന്ന മൂന്നു പേരുടെ രേഖാ ചിത്രം പൊലീസ് പുറത്തുവിട്ടു.എന്നാല്‍ സാക്ഷിമൊഴികളുടെയും സാഹചര്യതെളിവുകളുടെയും അടിസ്ഥാനത്തില്‍ തയ്യാറാക്കിയ രേഖാചിത്രമല്ലാതെ മറ്റൊരു തെളിവും ഇതുവരെ പൊലീസിനു ലഭിച്ചിട്ടില്ല.രേഖാ ചിത്രം പുറത്തുവിട്ടവരില്‍ രണ്ടു പേര്‍ കൃത്യത്തില്‍ നേരിട്ട് പങ്കാളികളായിരുന്നെന്നാണ് അന്വേഷണ സംഘത്തിന്റെ വിലയിരുത്തല്‍

പ്രതികളെന്നു സംശയിക്കുന്ന ഇവര്‍ സാഹചര്യങ്ങള്‍ പഠിക്കാനായി കുറഞ്ഞത്ഒരാഴ്ചയെങ്കിലും ഗൗരിയുടെ വീടിനു സമീപത്തു താമസിച്ചിരുന്നിരിക്കാമെന്നും അന്വേഷണ സംഘം പറയുന്നുണ്ട്.ഈ സമയത്താകും കൊലപാതകം എങ്ങനെയായിരിക്കണമെന്ന് ക്രമീകരിച്ചിരിക്കുന്നത്.സിസിടിവി ദൃശ്യങ്ങളില്‍ ഒരാളുടെ മുഖം വ്യക്തമല്ലാത്തതിനാല്‍ നിരവധി ലാബുകളില്‍ പരിശോധനയ്ക്കയച്ച ശേഷമാണ് രേഖാചിത്രം തയ്യാറാക്കിയത്

സെപ്റ്റംബര്‍ അഞ്ചിന് രാത്രിയാണ് ഗൗരി ബാംഗ്ലൂരുവിലെ വീട്ടില്‍ വെടിയേറ്റ് കൊല്ലപ്പെട്ടത്.ബൈക്കിലെത്തിയ രണ്ടു പേര്‍ ഗൗരിക്കു നേരേ നിറയൊഴിക്കുകയായിരുന്നു.നാലു ബുള്ളറ്റുകളാണ് ഇവരുടെ ശരീരത്തില്‍ തുളഞ്ഞു കയറിയത്.ഗൗരി സംഭവസ്ഥലത്തു തന്നെ മരിച്ചു.