വിജയ് ക്രിസ്‌ത്യാനിയായതിനാലാണ് മോദിയെ വിമര്‍ശിക്കുന്നത്: മെര്‍സലിനെതിരെ ബിജെപി

ഇളയദളപതി വിജയുടെ വമ്പന്‍ ഹിറ്റായ മെര്‍സലിനെതിരെ ബിജെപി. കേന്ദ്ര സര്‍ക്കാരിന്റെ ജിഎസ്ടിയേയും ഡിജിറ്റല്‍ ഇന്ത്യയേയും പരാമര്‍ശിക്കുന്ന സീനുകള്‍ ചിത്രത്തില്‍ നിന്നും ഒഴിവാക്കണമെന്ന ബിജെപിയുടെ ആവശ്യം അണിയറ പ്രവര്‍ത്തകര്‍ ഒഴിവാക്കുമെന്ന വാര്‍ത്ത പുറത്തുവരുന്നതിനിടെ വിജയ്‌ക്കെതിരെ വിദ്വോഷ പ്രസ്‌താവനയുമായി ബിജെപി നേതാവ് എച്ച് രാജ രംഗത്ത്.

“ വിജയ് ക്രിസ്‌ത്യാനിയായതിനാലാണ്‌ നരേന്ദ്ര മോദി സര്‍ക്കാരിനെതിരെ വിദ്വോഷ പ്രചാരണം നടത്തുന്നത്. സിനിമയുടെ നിര്‍മാതാവ് ഹേമ രുക്മാനിയയും ക്രിസ്ത്യാനിയാണോ എന്ന കാര്യം പരിശോധിച്ചു വരുകയാണ് ” - എന്നും രാജ പറഞ്ഞു.

അതേസമയം, ചിത്രത്തിന് പിന്തുണയുമായി സംവിധായകന്‍ പാ രഞ്ജിത്തിനു പിന്നാലെ കമലഹാസന്‍ രംഗത്തെത്തി. വിമര്‍ശനങ്ങളെ വസ്തുതകള്‍ കൊണ്ട് നേരിടുകയാണ് വേണ്ടത്. അല്ലാതെ വിമര്‍ശകരുടെ വായടപ്പിക്കുകയല്ല പാര്‍ട്ടിയും പാര്‍ട്ടിപ്രവര്‍ത്തകരും ചെയ്യേണ്ടത്. സംസാരിക്കുമ്പോള്‍ മാത്രമേ ഇന്ത്യ തിളങ്ങുന്നൂ എന്ന് പറയാന്‍ കഴിയൂ. ഒരിക്കല്‍ സെന്‍സര്‍ ചെയ്ത് സര്‍ട്ടിഫിക്കറ്റ് നല്‍കിയ ചിത്രമാണ് മെര്‍സല്‍. ഇനി വീണ്ടും അതിനെ സെന്‍സര്‍ ചെയ്യരുതെന്ന് കമല്‍ പറഞ്ഞു. രാജ്യത്തെ ജനങ്ങള്‍ അനുഭവിക്കുന്ന ബുദ്ധിമുട്ടുകളാണ് വിജയ് നായകനായ മെര്‍സലിലുള്ളതെന്നും ആ രംഗങ്ങള്‍ക്ക് പ്രേക്ഷകരില്‍നിന്ന് നല്ല പിന്തുണയാണ് ലഭിക്കുന്നതെന്നും പാ രഞ്ജിത്ത് വെള്ളിയാഴ്‌ച വ്യക്തമാക്കിയിരുന്നു.