അഫ്ഗാനില്‍ ടെലിവിഷന്‍ ചാനലിന് നേരെ ഐഎസ് ആക്രമണം ; മണിക്കൂറുകള്‍ക്കകം പ്രേക്ഷേപണം നടത്തി ചാനല്‍ ഞെട്ടിച്ചു !

അഫ്ഗാനിലെ ഷംഷാദ് ടെലിവിഷന്‍ ചാനല്‍ ആസ്ഥാനത്ത് ഐഎസ് ഭീകരര്‍ നടത്തിയ ആക്രമണത്തില്‍ ഒരാള്‍ കൊല്ലപ്പെട്ടു. ഇരുപതിലേറെ ആളുകള്‍ക്ക് പരിക്കേറ്റു. പരിക്കേറ്റവരില്‍ ആറുപേരുടെ നില ഗുരുതരമാണ്.

ആക്രമണം നടന്ന് മണിക്കൂറുകള്‍ക്കകം വീണ്ടും പ്രേക്ഷേപണം നടത്തി ചാനല്‍ എല്ലാവരേയും ഞെട്ടിച്ചു. ഭീകരര്‍ക്ക് മുന്നില്‍ തോല്‍ക്കില്ല എന്നുകാണിച്ചുകൊണ്ടാണ് അവതാരകന്‍ എത്തിയത്. 'ഞങ്ങള്‍ എല്ലാവരും തിരിച്ചെത്തി, തങ്ങളുടെ എല്ലാ മാധ്യമപ്രവര്‍ത്തകരും മറ്റു സഹപ്രവര്‍ത്തകരും തിരികെ ജോലിയില്‍ പ്രവേശിച്ചു' ഭീകരാക്രമണത്തിന് ശേഷം കൈയ്യിലെ മുറിവു വച്ച് കെട്ടി അവതാരകന്‍ പറഞ്ഞു.

ചാനലിന്റെ ഓഫീസിലേക്ക് പോലീസ് വേഷത്തിലേത്തിയ ആയുദ്ധധാരികള്‍ ഇടിച്ചുകയറുകയായിരുന്നു. ഏകദേശം മൂന്നോളം ഭീകരര്‍ എത്തിയിരുന്നതായാണ് റിപ്പോര്‍ട്ട്. ഇവരുടെ കൈയ്യില്‍ തോക്കുകളും ഗ്രനൈഡുകളും ഉണ്ടായിരുന്നു. കവാടത്തിനരികില്‍ ഒരാള്‍ ചാവേറായി പൊട്ടിത്തെറിക്കുകയും മറ്റൊരാള്‍ മുകള്‍ നിലയിലേക്ക് പോയി വെടിയുതിര്‍ക്കുകയായിരുന്നു.

സംഭവസമയത്ത് മാധ്യമത്തിലെ ജീവനക്കാര്‍ ഓഫീസിനുള്ളിലായിരുന്നു. ചിലര്‍ ജനല്‍വഴി പുറത്തേക്ക് ചാടുകയും ചെയ്തു. മറ്റുചിലര്‍ അടുത്തുള്ള കെട്ടിടത്തിലേക്ക് കയറി അവിടെ നിന്നും രക്ഷപെട്ടതായും അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തു.