പദ്മാവതി പോര് തുടരുന്നു ; പ്രദര്‍ശനം ഗുജറാത്തും നിരോധിച്ചു, പാഠപുസ്തകമാക്കി മധ്യപ്രദേശ്

പ്രധാനമന്ത്രി നരേന്ദ്ര മോഡി പങ്കെടുക്കുന്ന ചടങ്ങില്‍നിന്ന് നടി ദീപികാ പദുക്കോണ്‍ പിന്‍വാങ്ങി. ദീപിക കേന്ദ്രകഥാപാത്രത്തെ അവതരിപ്പിക്കുന്ന പദ്മാവതി സിനിമയ്‌ക്കെതിരേ ബി.ജെ.പി. നേതാക്കളില്‍ ചിലര്‍ രംഗത്തെത്തിയ പശ്ചാത്തലത്തിലാണ് ചടങ്ങില്‍നിന്നുള്ള ദീപികയുടെ പിന്മാറ്റം. െഹെദരാബാദില്‍ നടക്കുന്ന ഗ്ളോബല്‍ എന്റര്‍പ്രനര്‍ഷിപ്പ് സമ്മിറ്റിന്റെ ഉദ്ഘാടനത്തില്‍നിന്നാണ് ദീപികയുടെ പിന്മാറ്റം. ഈ മാസം 28ന്‌ ആരംഭിക്കുന്ന സമ്മേളനത്തില്‍ യു.സ്. പ്രസിഡന്റിന്റെ മകളും ഉപദേഷ്ടാവുമായ ഇവാന്‍ക ട്രംപും പങ്കെടുക്കുന്നുണ്ട്.

അടുത്ത അധ്യയന വര്‍ഷം മുതല്‍ മധ്യപ്രദേശിലെ സ്‌കൂള്‍ പാഠപുസ്തകത്തില്‍ രജപുത്ര റാണി പദ്മിനിയുടെ കഥയും ഉള്‍പ്പെടുത്തും. മുഖ്യമന്ത്രി ശിവരാജ് സിങ് ചൗഹാനാണു ഇതുസംബന്ധിച്ച പ്രഖ്യാപനം നടത്തിയത്. വളച്ചൊടിച്ച ചരിത്രമാണ് പുതിയ തലമുറയെ പഠിപ്പിക്കുന്നതെന്നും അതു പരിഹരിക്കുന്നതിനാണു പാഠപുസ്തകത്തില്‍ റാണി പദ്മിനിയുടെ കഥ ഉള്‍പ്പെടുത്തുന്നതെന്നും മുഖ്യമന്ത്രി പറഞ്ഞു. മധ്യപ്രദേശിനു പിന്നാലെ ഗുജറാത്തും പദ്മാവതി പ്രദര്‍ശിപ്പിക്കുന്നതിന് നിരോധനം ഏര്‍പ്പെടുത്തി.