രാഹുല്‍ ഗാന്ധി കോണ്‍ഗ്രസ് അദ്ധ്യക്ഷനായി ഇന്ന് പത്രിക സമര്‍പ്പിക്കും

രാഹുല്‍ഗാന്ധി കോണ്‍ഗ്രസ് അദ്ധ്യക്ഷനായി ഇന്ന് നാമനിര്‍ദേശ പത്രിക സമര്‍പ്പിക്കും. പാര്‍ട്ടി തെരഞ്ഞെടുപ്പ് പ്രക്രിയകള്‍ക്ക് തുടക്കമാകുന്ന തിങ്കളാഴ്ച ഏകദേശം രണ്ടു ദശകങ്ങള്‍ക്ക് ശേഷമാണ് കോണ്‍ഗ്രസ് അദ്ധ്യക്ഷ സ്ഥാനത്തേക്ക് പുതിയ ആളെ നിയോഗിക്കുന്നത്. ഐക്യ കണേ്ഠ്യനെയുള്ള തെരഞ്ഞെടുപ്പായി മാറിയേക്കുമെന്നാണ് സൂചന. എതിര്‍ സ്ഥാനാര്‍ത്ഥി ഇല്ലെങ്കില്‍ 19 ന് രാഹുലിനെ അദ്ധ്യക്ഷനാക്കിക്കൊണ്ട് പ്രഖ്യാപനം ഉണ്ടാകുമെന്നാണ് സൂചന.

നാമനിര്‍ദേശ നടപടികളും സൂഷ്മപരിശോധനകളും ഇന്നും നാളെയുമായി പൂര്‍ത്തിയാകും. ഡിസംബര്‍ 11 വരെയാണ് പത്രിക പിന്‍വലിക്കാനുള്ള സമയം. എതിര്‍ സ്ഥാനാര്‍ത്ഥികള്‍ ഉണ്ടെങ്കില്‍ ഗുജറാത്ത്, ഹിമാചല്‍ പ്രദേശ് തെരഞ്ഞെടുപ്പിനും ഫലപ്രഖ്യാപനത്തിനും ശേഷം ഡിസംബര്‍ 16 നായിരിക്കും പുതിയ അദ്ധ്യക്ഷനെ പ്രഖ്യാപിക്കുക. ഏകദേശം 20 വര്‍ഷങ്ങള്‍ക്ക് ശേഷമാണ് കോണ്‍ഗ്രസിന് പുതിയ അദ്ധ്യക്ഷന്‍ എത്തുന്നത്.