മുത്തലാഖ് ബില്‍: രാജ്യസഭയില്‍ അവതരിപ്പിക്കുന്നത് നാളത്തേക്ക് മാറ്റും

മുത്തലാഖ് ബില്‍ രാജ്യസഭയില്‍ അവതരിപ്പിക്കുന്നത് നാളത്തേക്ക് മാറ്റി. ബില്ലില്‍ ഭേദഗതികള്‍ വേണമെന്ന് പ്രതിപക്ഷം ആവശ്യപ്പെട്ടിരുന്നു. രാജ്യസഭയില്‍ ബില്‍ പാസാകണമെങ്കില്‍ കോണ്‍ഗ്രസ് കൂടി മനസ്സുവയ്ക്കണം. അതുകൊണ്ടുതന്നെ ബില്ലില്‍ സമവായത്തില്‍ എത്തിയ ശേഷം സഭയില്‍ വയ്ക്കാനാണ് സര്‍ക്കാര്‍ ആലോചന.

ബില്‍ സെലക്ട് കമ്മിറ്റിക്ക് വിടണമെന്ന് ഡി.എം.കെ എം.പി കനിമൊഴി ആവശ്യപ്പെട്ടു. സി.പി.ഐ അംഗം ഡി.രാജയും ഈ ആവശ്യം മുന്നോട്ടുവച്ചിട്ടുണ്ട്. മുത്തലാഖിനെ ക്രിമിനല്‍ വത്കരിക്കുന്നതിനെ അനുകൂലിക്കില്ലെന്ന് എന്‍.സി.പി അംഗം മജീദ് മേമന്‍ പറഞ്ഞു. മുസ്ലീം വിവാഹം സിവില്‍ കരാര്‍ ആണ്. മുത്തലാഖിന്റെ പേരില്‍ മൂന്നു വര്‍ഷം തടവുശിക്ഷ നല്‍കുന്ന നിയമത്തെ അംഗീകരിക്കാന്‍ കഴിയില്ലെന്നും ഇത് പുനപരിശോധിക്കുന്നതിനായി സെലക്ട് കമ്മിറ്റിക്ക് വിടണമെന്നും മേമന്‍ ആവശ്യപ്പെട്ടു. ബില്‍ സുഗമമായി അവതരിപ്പിക്കുന്നതിന് കോണ്‍ഗ്രസും മറ്റു കക്ഷികളുമായി ചര്‍ച്ച നടത്തുമെന്നും അതിനായി ബില്‍ നാളത്തേക്ക് മാറ്റുന്നത് പരിഗണനയിലാണെന്നും പാര്‍ലമെന്ററി കാര്യമന്ത്രി അനന്തകുമാര്‍ അറിയിച്ചു.