ജസ്റ്റീസ് ലോയയുടെ മരണം ഹൃദയാഘാതം മൂലമെന്ന് മഹാരാഷ്ട്ര ; സുപ്രീം കോടതി ബെഞ്ച് വാദം കേള്‍ക്കുന്നു

ജഡ്ജിയായിരുന്ന ബി.എച്ച് ലോയയുടെ ദുരൂഹ മരണത്തില്‍ ചീഫ് ജസ്റ്റീസ് ദീപക് മിശ്ര അധ്യക്ഷനായ സുപ്രീം കോടതി ബെഞ്ച് വാദം കേള്‍ക്കുന്നു. ജസ്റ്റീസ് ലോയയുടെ മരണം ഹൃദയാഘാതം മൂലമാണെന്നും അതില്‍ ദുരൂഹതയില്ലെന്നും മഹാരാഷ്ട്ര സര്‍ക്കാര്‍ സമര്‍പ്പിച്ച സത്യവാങ്മൂലത്തില്‍ ചൂണ്ടിക്കാട്ടുന്നു.

അതിനിടെ, നാഗ്പൂര്‍ കോടതിയിലും ബോംബെ ഹൈക്കോടതിയിലും പരിഗണനയിലിരുന്ന ഹര്‍ജികളയും സുപ്രീം കോടതിയിലേക്ക് മാറ്റി. ചീഫ് ജസ്റ്റീസിനു പുറമേ എ.എം ഖന്‍വില്‍കര്‍, ഡി.വൈ ചന്ദ്രചൂഢ് എന്നിവരും ബെഞ്ചിലുണ്ട്. ഒരു ഹൈക്കോടതിയും ലോയയുടെ കേസ് പരിഗണിക്കരുതെന്നും ഗൗരവമായി പരിശോധിക്കേണ്ട കേസാണിതെന്നും ജസ്റ്റീസ് ചന്ദ്രചൂഢ് വാദം കേള്‍ക്കുന്നതിനിടെ ചൂണ്ടിക്കാട്ടി. മുതിര്‍ന്ന അഭിഭാഷകന്‍ ഹരീഷ് സാല്‍വേയാണ് മഹാരാഷ്ട്ര സര്‍ക്കാരിന് വേണ്ടി ഹാജരായിരിക്കുന്നത്. ഈ കേസില്‍ ഒരു ദുരൂഹതയുമില്ലെന്നു ജസ്റ്റീസ് ലോയയുടെ ഒപ്പമുണ്ടായിരുന്ന മറ്റ് നാല് ജഡ്ജിമാര്‍ മൊഴി നല്‍കിയിട്ടുണ്ട്. അവരില്‍ രണ്ടു പേര്‍ ഇപ്പോള്‍ ഹൈക്കോടതി ജഡ്ജിമാരാണ്. അവര്‍ ലോയയുടെ മരണ സമയത്ത് ആശുപത്രിയില്‍ ഉണ്ടായിരുന്നവരാണെന്നും സാല്‍വെ ചൂണ്ടിക്കാട്ടി.