എന്റെ സച്ചി പൃഥ്വി പറയുന്നു

ആഷിഖ് അബുവുമൊത്തുള്ള ആദ്യ ചിത്രം വാരിയംകുന്നന്‍ പ്രഖ്യാപിച്ച ശേഷമുള്ള പൃഥ്വിരാജിന്റെ ആദ്യ പോസ്റ്റ്. ഈ ചിത്രം വരാന്‍ പോകുന്നു എന്ന വാര്‍ത്തയ്ക്ക് ശേഷം രൂക്ഷമായ സൈബര്‍ ആക്രമണമാണ് പൃഥ്വിരാജിന്റെ നേര്‍ക്കുണ്ടായത്. ഈ വിഷയത്തിലേക്ക് താരത്തിന്റെ അച്ഛനമ്മമാരുടെ പേരുകള്‍ പോലും വലിച്ചിഴച്ചായിരുന്നു ആക്രമണം. മലബാര്‍ കലാപത്തിലെ പ്രധാനിയായ വാരിയന്‍കുന്നത്ത് കുഞ്ഞഹമ്മദ് ഹാജി കഥാപാത്രമാവുന്ന ചിത്രമാണിത്. ഇത്രയും രൂക്ഷമായ ആക്രമണം നടത്തിയിട്ടും ഈ വിഷയത്തില്‍ പൃഥ്വിരാജ് ഒരുതരത്തിലും പ്രതികരിച്ചിരുന്നില്ല. സിനിമയുടെ പ്രഖ്യാപനത്തിന് ശേഷം വരുന്ന പൃഥ്വിരാജിന്റെ ആദ്യ പോസ്റ്റ് പ്രിയപ്പെട്ട സച്ചിയെപ്പറ്റിയാണ്. തിയേറ്ററിലെത്തിയ ഏറ്റവും ഒടിവിലത്തെ പൃഥ്വിരാജ് ചിത്രം 'അയ്യപ്പനും കോശിയും' സംവിധാനം ചെയ്തത് സച്ചിയാണ്. അനാര്‍ക്കലിയിലെ പൃഥ്വിരാജ്-ബിജു മേനോന്‍ കൂട്ടുകെട്ട് തന്നെയാണ് ഇവിടെയും നായക കഥാപാത്രങ്ങളില്‍ എത്തിയത്.ചിത്രം ബോളിവുഡിലേക്ക് റീ-മേക് ചെയ്യാനുള്ള അവകാശം ജോണ്‍ എബ്രഹാമിന്റെ നേതൃത്വത്തിലുള്ള പ്രൊഡക്ഷന്‍ കമ്പനി സ്വന്തമാക്കിയ ശേഷമാണ് സച്ചിയുടെ ആകസ്മിക നിര്യാണം. ശസ്ത്രക്രിയയെ തുടര്‍ന്ന് ഹൃദയാഘാതം സംഭവിച്ച സച്ചി അബോധാവസ്ഥയിലാവുകയായിരുന്നു. ജൂണ്‍ 19നായിരുന്നു അന്ത്യം. നദിയുടെ ഓളങ്ങളില്‍ നീന്തുന്ന ഇലയും പുഷ്പങ്ങളും അങ്ങകലെ കാണുന്നു. ശേഷക്രിയ ചെയ്ത ശേഷമുള്ള ചിത്രമാണിത്. ഹൃദയത്തോട് ചേര്‍ന്ന് നിന്ന വ്യക്തിയുടെ അഭാവം തീര്‍ത്ത നൊമ്പരം ഒരു ഹൃദയത്തിന്റെ പ്രതിബിംബത്തിലൂടെ പൃഥ്വി കോറിയിടുന്നു.