സ്വര്‍ണകടത്ത്:ഗള്‍ഫ് ചാര്‍ട്ടഡ് വിമാനങ്ങള്‍ക്ക് മൂക്കുകയര്‍

 

കൊവിഡ് കാലത്ത് ചാര്‍ട്ടഡ് വിമാനങ്ങളില്‍ സ്വര്‍ണകടത്ത് തുടര്‍ച്ചയാകുന്നതിനാല്‍ ഇന്ത്യയിലേക്ക് ഇങ്ങനെ വിമാനം അനുവദിക്കുന്നതിന് കടുത്ത നിയന്ത്രണം വരുന്നു. കേരളത്തില്‍ വന്ന നാലിലേറ വിമാനങ്ങളില്‍ നിന്ന് സ്വര്‍ണം പിടികൂടിയ സാഹചര്യത്തിലാണ് കടുത്ത നിലപാടിലേക്ക് സര്‍ക്കാര്‍ നീങ്ങുന്നത്. വിമാനങ്ങള്‍ ചാര്‍ട്ടുചെയ്യുന്ന സംഘടനകളെ അടക്കം സംശയത്തിന്റെ നിഴലേക്ക് മാറ്റുന്ന രീതിയിലാണ് അന്വേഷണം നീങ്ങുന്നത്. ഇതിന്റെ വിശദ വിവരങ്ങള്‍ പുറത്തുവിട്ടിട്ടില്ല. ഇനിമുതല്‍ ചാട്ടഡ് ഫ്‌ളൈറ്റില്‍ എത്തുന്നവരെ കര്‍ശന പരിശോധന നടത്തിയ ശേഷം പുറത്തുവിട്ടാല്‍ മതി എന്ന നിര്‍ദേശം നല്‍കി കഴിഞ്ഞു. അതിനു പുറമെ ഇത്തരം ആളുകളുടെ നാട്ടിലെ പ്രവര്‍ത്തനങ്ങള്‍ നിരീക്ഷിക്കാനും പൊലീസിനെ ചുമതലപെടുത്തിയിട്ടുണ്ട്. കാസര്‍ഗോഡ് ആദ്യഘട്ടത്തില്‍ കൊവിഡ് സ്ഥരീകരിച്ച ഒരു വ്യക്തിയുടെ വിദേശ യാത്രകള്‍ ഇപ്പോള്‍ തന്നെ കേന്ദ്ര ഏജന്‍സികള്‍ അന്വേഷിക്കുന്നുണ്ട് അതിനു പിന്നാലെയാണ് പുതിയകടത്തുകള്‍ പുറത്തുവരുന്നത്. ഏറ്റവും ഒടുവില്‍ ഇന്നലെ കരിപ്പൂരില്‍ ചാര്‍ട്ടേഡ് വിമാനത്തില്‍ വീണ്ടും സ്വര്‍ണക്കടത്ത്. 440 ഗ്രാം സ്വര്‍ണവുമായി കോഴിക്കോട് കല്ലോട് സ്വദേശി സാജിദി (30)നെ എയര്‍കസ്റ്റംസ് ഇന്റലിജന്‍സ് വിഭാഗം കസ്റ്റഡിയിലെടുത്തോടെയാണ് കൂടുതല്‍ കര്‍ശന നിലപാട് വേണമെനന ശുപാര്‍ശ വന്നിരിക്കുന്നത്. ഇന്നലെ പിടികൂടിയ സ്വര്‍ണത്തിന് 17.6 ലക്ഷം രൂപ വിലവരും. റാസല്‍ഖൈമയില്‍നിന്നുള്ള ചാര്‍ട്ടേഡ് വിമാനത്തിലാണ് ഇയാളെത്തിയത്. ശരീരത്തില്‍ ഒളിപ്പിച്ച നിലയിലായിരുന്നു മൂന്ന് സ്വര്‍ണ ക്യാപ്സൂളുകള്‍. കൊണ്ടോട്ടിയിലെയും പരിസരങ്ങളിലെയും ആശുപത്രികള്‍ എക്സറേ പരിശോധനാ സൗകര്യം നിഷേധിച്ചു. പ്രത്യേക ആംബുലന്‍സില്‍ തിരൂരങ്ങാടി സര്‍ക്കാര്‍ ആശുപത്രിയിലെത്തിച്ചാണ് യാത്രക്കാരന്റെ പരിശോധന പൂര്‍ത്തിയാക്കിയത്. കസ്റ്റംസ് ഡെപ്യൂട്ടി കമീഷണര്‍ ആര്‍ രാജിയുടെ നേതൃത്വത്തിലാണ് സ്വര്‍ണം പിടികൂടിയത്.