ദക്ഷിണ കന്നടയില്‍ കോവിഡ് വ്യാപനം രൂക്ഷം

കോവിഡ് വ്യാപനം രൂക്ഷമാകുന്ന ദക്ഷിണ കന്നടയില്‍ ബുധനാഴ്ച രണ്ട് പേര്‍ കൂടി കൊവിഡ് രോഗബാധയെ തുടര്‍ന്ന് മരിച്ചു. ബെംഗ്രെ സ്വദേശിയായ 78കാരനും ഭട്കല്‍ സ്വദേശിയായ 31കാരനുമാണ് മരിച്ചത്. ഇതോടെ ദക്ഷിണ കന്നടയില്‍ മാത്രം കോവിഡ് മരണം 16 ആയി. ന്യൂമോണിയയും പ്രമേഹവും കാരണം ചികിത്സയിലായിരുന്ന 78കാരന്‍ സ്വകാര്യ ആശുപത്രിയില്‍ വച്ചാണ് മരിച്ചത്. ഉയര്‍ന്ന രക്തസമ്മര്‍ദവുമായി സ്വകാര്യ ആശുപത്രിയില്‍ പ്രവേശിപ്പിച്ച 31കാരന്‍ ചികിത്സക്കിടെയാണ് മരിച്ചത്. ഇദ്ദേഹത്തിന്റെ സ്രവം മരണശേഷമാണ് ശേഖരിച്ചത്. കോവിഡ് രോഗികളും മരണങ്ങളും ഗണ്യമായി വര്‍ധിക്കുന്നത് ആശങ്കയ്ക്ക് വഴിവെക്കുന്നുണ്ട്. കഴിഞ്ഞ 3 ദിവസങ്ങളിലായി ദക്ഷിണ കന്നടയില്‍ മാത്രം ആറ് പേരാണ് കോവിഡ് ബാധിച്ച് മരിച്ചത്. മംഗളൂരുവില്‍ കൊവിഡ് വ്യാപനം രൂക്ഷമായത് അതിര്‍ത്തി ജില്ലയായ കാസര്‍ഗോഡും ആശങ്ക സൃഷ്ടിക്കുന്നുണ്ട്.