വേദനിലയം വീണ്ടും അധികാരകേന്ദ്രം

തമിഴ്നാട്ടിൽ മുൻ മുഖ്യമന്ത്രി ജയലളിതയുടെ പോയസ് ഗാർഡനിലെ വസതി വേദനിലയം മുഖ്യമന്ത്രിയുടെ ഔദ്യോഗിക വസതിയാക്കുന്നതും സംസ്ഥാന സർക്കാർ പരിഗണിച്ചുവരുന്നു. ബുധനാഴ്ച മദ്രാസ് ഹൈക്കോടതിയിൽ സർക്കാർ അറിയിച്ചതാണിത്. ജയലളിതയുടെ വസതി സ്മാരകമാക്കുന്നതിനെതിരേ പ്രദേശവാസികളുടെ അസോസിയേഷൻ സമർപ്പിച്ച ഹർജിയിൽ വാദം കേൾക്കുമ്പോഴാണ് അഡ്വക്കറ്റ് ജനറൽ വിജയ് നാരായൺ ജസ്റ്റിസ് ആനന്ദ് വെങ്കടേഷ് മുമ്പാകെ ഇക്കാര്യം ബോധിപ്പിച്ചത്. സ്മാരകമാക്കുന്നതിനു പകരം മുഖ്യമന്ത്രിയുടെ ഔദ്യോഗിക വസതി വേദനിലയത്തിലാക്കുന്ന കാര്യം പരിഗണിക്കണമെന്ന് നേരത്തേ ഹൈക്കോടതി ഡിവിഷൻ ബെഞ്ച് അഭിപ്രായപ്പെട്ടിരുന്നു. ഇക്കാര്യം സർക്കാരിന്‍റെ സജീവ പരിഗണനയിലാണെന്നാണ് അഡ്വക്കറ്റ് ജനറൽ അറിയിച്ചത്. വേദനിലയം സ്മാരകമാക്കി മാറ്റിയാൽ ആയിരക്കണക്കിനാളുകൾ സന്ദർശനത്തിനെത്തുമെന്നും ഇതു തങ്ങളുടെ സമാധാന ജീവിതത്തിന് തടസമാകുമെന്നുമാണ് പോയസ് ഗാർഡൻ- കസ്തൂരി എസ്റ്റേറ്റ് ഹൗസ് ഓണേഴ്സ് അസോസിയേഷൻ വാദിക്കുന്നത്. കഴമ്പില്ലെന്നു പറഞ്ഞ് കോടതി ഹർജി തള്ളി. ഒരു വസതി സ്മാരകമാക്കുന്നത് പുതുമയുള്ള കാര്യമല്ല. ജനങ്ങളുടെ മനസിൽ സ്ഥിരപ്രതിഷ്ഠ നേടിയ നിരവധി നേതാക്കളുടെ വസതികൾ സ്മാരകങ്ങളായി മാറിയിട്ടുണ്ട്- ജഡ്ജി ചൂണ്ടിക്കാട്ടി. വേദനിലയവും ജയലളിതയുടെ മറ്റ് ആസ്തികളും താത്കാലികമായി ഏറ്റെടുത്തുകൊണ്ട് മേയ് മാസത്തിൽ തമിഴ്നാട് സർക്കാർ ഓർഡിനൻസ് പുറപ്പെടുവിച്ചിരുന്നു. ഫൗണ്ടേഷൻ രൂപീകരിച്ച് വേദനിലയം സ്മാരകമാക്കാനുള്ള തയാറെടുപ്പുകളും ആരംഭിച്ചിരുന്നു.