സച്ചിനെ മെരുക്കാന്‍ പ്രിയങ്കയും രാഹുലും

 

  സച്ചിന്‍ പൈലറ്റ് സ്വന്തം രാഷ്ട്രീയ പാര്‍ട്ടി ആരംഭിക്കുന്നതിനെ മറികടക്കാന്‍ അവസാന വട്ട ശ്രമവുമായി രാഹുലും പ്രിയങ്കയും. എടുത്തുചാടി ഒരു തീരുമാനവും പ്രഖ്യാപിക്കാതെ രാജസ്ഥാനില്‍ കോണ്‍ഗ്രസ് തന്നെ നശിപ്പിച്ചു എന്ന കാംപയിനാണ് സച്ചിന്‍ തുടക്കമിട്ടിരിക്കുന്നത്. ഇതിന്റെ അപകടം മനസിലാക്കിയാണ് രാഹുലിന്റെ നീക്കം സച്ചിന്‍ പൈലറ്റിനെ നിശിതമായി വിമര്‍ശിക്കുന്നത് അവസാനിപ്പിക്കാന്‍ രാജസ്ഥാന്‍ മുഖ്യമന്ത്രി അശോക് ഗെഹ് ലോട്ടിനോട് രാഹുല്‍ ഗാന്ധി നിര്‍ദേശിച്ചതായി അദ്ദേഹത്തോട് അടുത്ത വൃത്തങ്ങള്‍ പറയുന്നു. താന്‍ ബിജെപിയിലേക്കു പോകില്ലെന്ന് സച്ചിന്‍ വ്യക്തമാക്കിയിട്ടും യുവനേതാവിനെതിരേ ഗെഹ് ലോട്ട് ശക്തമായ വിമര്‍ശനം നടത്തുന്നത് സച്ചിനെ സഹായിക്കും എന്ന് തിരിച്ചറിഞ്ഞാണ് നീക്കം. സച്ചിന് വാതിലുകള്‍ എല്ലാം അടഞ്ഞിട്ടില്ലെന്നാണ് കോണ്‍ഗ്രസ് ഹൈക്കമാന്‍ഡ് ആവര്‍ത്തിക്കുന്നത്. അതേസമയമാണ് തന്റെ സര്‍ക്കാരിനെതിരേ ഉപമുഖ്യമന്ത്രിയും പിസിസി അധ്യക്ഷനുമായിരുന്ന സച്ചിന്‍ നേരിട്ട് ഗൂഢാലോചന നടത്തിയെന്ന് ഗെഹ് ലോട്ട് ആരോപിച്ചത്. എങ്ങനെയും സച്ചിനെ പാര്‍ട്ടിയില്‍ നിന്നു പുറംതള്ളാനുള്ള ഗെഹ് ലോട്ടിന്റെ നീക്കത്തില്‍ ഹൈക്കമാന്‍ഡിന് അതൃപ്തിയുണ്ട്. താന്‍ ഇപ്പോഴും കോണ്‍ഗ്രസിലാണെന്നും പാര്‍ട്ടിയെക്കുറിച്ച് ഒരു വിമര്‍ശനവും നടത്തിയിട്ടില്ലെന്നുമാണ് സച്ചിന്‍ കഴിഞ്ഞ ദിവസവും പറഞ്ഞത്. നെഹ്‌റു- ഗാന്ധി കുടുംബവുമായുള്ള തന്റെ സൗഹൃദം തകര്‍ക്കാന്‍ രാജസ്ഥാനിലെ ചില കോണ്‍ഗ്രസ് നേതാക്കള്‍ ശ്രമിക്കുകയാണെന്നും സച്ചിന്‍ ആരോപിച്ചിരുന്നു. ബുധനാഴ്ച സച്ചിന്‍ വാര്‍ത്താസമ്മേളനം വേണ്ടെന്നുവച്ചതും രാഹുലും പ്രിയങ്കയുമായുള്ള അദ്ദേഹത്തിന്റെ അടുപ്പം വച്ചാണ്. രാഹുല്‍ ഗാന്ധിയുമായി സച്ചിന്‍ നേരിട്ടു സംസാരിച്ചിട്ടില്ലെന്നാണ് പാര്‍ട്ടി വൃത്തങ്ങള്‍ പറയുന്നത്. എന്നാല്‍, ഇരുവര്‍ക്കിടയിലെയും സുഹൃത്തുക്കള്‍ വഴി പരസ്പരം ബന്ധപ്പെടുന്നുണ്ട്. സച്ചിനെ ദേശീയ നേതൃത്വത്തില്‍ കൊണ്ടുവരുന്നതിന് രാഹുല്‍ അനുകൂലമാണെന്നും റിപ്പോര്‍ട്ടുകളുണ്ട്. പ്രിയങ്ക മൂന്നു തവണ സച്ചിനുമായി സംസാരിച്ചെന്നും പാര്‍ട്ടി വൃത്തങ്ങള്‍ പറയുന്നു. നിയമസഭാ കക്ഷിയില്‍ ബഹുഭൂരിപക്ഷം ഗെഹ് ലോട്ടിന് അനുകൂലമായതിനാല്‍ രാജസ്ഥാന്‍ മുഖ്യമന്ത്രിസ്ഥാനം സച്ചിനു നല്‍കാനാവില്ല. അതേസമയം, മറ്റെന്തും പരിഗണിക്കാമെന്നാണ് പ്രിയങ്കയും രാഹുലും പറയുന്നത്. ഇനിയെല്ലാം സച്ചിന്റെ തീരുമാനം അനുസരിച്ചായിരിക്കുമെന്നും അവര്‍ വ്യക്തമാക്കുന്നു. തനിക്ക് 106 എംഎല്‍എമാരുടെ പിന്തുണയുണ്ടെന്നും വിമതപക്ഷം ദുര്‍ബലമായിക്കഴിഞ്ഞെന്നുമാണ് ഗെഹ് ലോട്ട് അവകാശപ്പെടുന്നത്.