രാജസ്ഥാൻ ബിജെപി ലക്ഷ്യം

എത്രയും വേഗം നിയമസഭാ സമ്മേളനം വിളിക്കണമെന്ന മന്ത്രിസഭയുടെ ആവശ്യം ഗവർണർ പരിഗണിക്കാത്തപക്ഷം രാഷ്ട്രപതിയെ സമീപിക്കുമെന്ന് രാജസ്ഥാൻ മുഖ്യമന്ത്രി അശോക് ഗെലോട്ട്. ഗവർണർ കൽരാജ് മിശ്രയുടെ നടപടിയെ നിശിതമായി വിമർശിച്ച ഗെലോട്ട് വേണ്ടിവന്നാൽ രാഷ്ട്രപതി ഭവനു മുന്നിലും ധർണ നടത്തുമെന്നും പറഞ്ഞു. 21 ദിവസം കൂടി ഹോട്ടലിൽ തങ്ങാൻ തയാറെടുക്കാൻ എംഎൽഎമാരോട് ആവശ്യപ്പെട്ടു. ഇന്നലെ വൈകിട്ടു ചേർന്ന മന്ത്രിസഭാ യോഗം നിയമസഭ വിളിച്ചു ചേർക്കാൻ വീണ്ടും ഗവർണറോടു ശുപാർശ ചെയ്തു. ഭൂരിപക്ഷമുണ്ടെന്നിരിക്കെ എന്തിനാണു സഭ വിളിച്ചു ചേർത്തു വിശ്വാസവോട്ടു തേടുന്നത് എന്നതടക്കമുള്ള കാര്യങ്ങളാണു ഗവർണർ ഉന്നയിച്ചിരുന്നത്. അതേസമയം, ബിജെപി സംസ്ഥാന പ്രസിഡന്റ് സതീഷ് പൂനിയയുടെ നേതൃത്വത്തിൽ 12 മുതിർന്ന നേതാക്കൾ ഇന്നലെ ഗവർണറെ കണ്ടു. സഭ വിളിച്ചു ചേർക്കണമെന്നു ഗവർണറെ നിർബന്ധിക്കാൻ സർക്കാരിന് അവകാശമില്ലെന്നു ബിജെപി നേതാക്കൾ പറഞ്ഞു. ബിജെപി ലക്ഷ്യം രാഷ്ട്രപതി ഭരണം ∙ മധ്യപ്രദേശിലും കർണാടകത്തിലും പരീക്ഷിച്ചു വിജയിച്ച മാതൃക പരാജയപ്പെട്ടതോടെ രാജസ്ഥാനിൽ രാഷ്ട്രപതി ഭരണം ലക്ഷ്യമിട്ടുള്ള നീക്കങ്ങളുമായി ബിജെപി. ഇന്നലെ ഗവർണറെ കണ്ടശേഷം ബിജെപി നേതാക്കൾ മുന്നോട്ടുവച്ച വാദഗതികൾ പാർട്ടി ലക്ഷ്യമിടുന്നതു രാഷ്ട്രപതി ഭരണമാണെന്നു വ്യക്തമാക്കുന്നു. നിയമസഭ വിളിച്ചു ചേർക്കാനുള്ള മുഖ്യമന്ത്രിയുടെ തീരുമാനമാണു പുതിയ വഴി തേടാൻ ബിജെപിയെ പ്രേരിപ്പിക്കുന്നത്. മുഖ്യമന്ത്രി സ്ഥാനത്തേക്കു കരുതിയിരിക്കുന്ന കേന്ദ്രമന്ത്രി ഗജേന്ദ്ര സിങ് ഷെഖാവത്തിനെതിരെയുള്ള കേസുകൾ പാർട്ടിയെ പ്രതിരോധത്തിലാക്കിയിട്ടുണ്ട്. അയോഗ്യതാ പ്രശ്നത്തിൽ വിമത എംഎൽഎമാർ നൽകിയിരിക്കുന്ന കേസിൽ ഇന്നു സുപ്രീം കോടതിയുടെ തീരുമാനവും നിർണായകമാകും. ഗവർണർക്കെതിരെ കോൺഗ്രസ് ന്യൂഡൽഹി ∙ ഗവർണർ കൽരാജ് മിശ്രയ്ക്കെതിരെ രാജ്യവ്യാപക പ്രക്ഷോഭത്തിനൊരുങ്ങി കോൺഗ്രസ്. നാളെ എല്ലാ സംസ്ഥാനങ്ങളിലും രാജ്ഭവനുകൾക്കു മുന്നിൽ പ്രതിഷേധം സംഘടിപ്പിക്കാൻ പാർട്ടി ദേശീയ നേതൃത്വം തീരുമാനിച്ചു. ഇതിനുള്ള ഒരുക്കങ്ങൾ നടത്താൻ സംസ്ഥാന പിസിസികൾക്കു സംഘടനാ ചുമതലയുള്ള ദേശീയ ജനറൽ സെക്രട്ടറി കെ.സി. വേണുഗോപാൽ നിർദേശം നൽകി.