കാലിഫോർണിയ ന്യൂയോർക്കിനെ മറികടന്നു

കൊവിഡ് വ്യാപനത്തിന്‍റെ തുടക്കത്തിൽ അമെരിക്കയിലെ ഏറ്റവും വലിയ വ്യാപന കേന്ദ്രമായിരുന്നു ന്യൂയോർക്ക് സംസ്ഥാനം. പിന്നീട് കാലിഫോർണിയയും ഇപ്പോൾ ഫ്ലോറിഡയും ന്യൂയോർക്കിനെ മറികടന്നിരിക്കുന്നു. ഞായറാഴ്ച 9,300 പുതിയ കേസുകൾ കണ്ടെത്തിയതോടെയാണ് ഫ്ലോറിഡയിലെ മൊത്തം രോഗബാധിതർ ന്യൂയോർക്കിലേതിനെക്കാൾ കൂടുതലായത്. ഫ്ലോറിഡയിൽ ഇപ്പോൾ 423,855 കൊവിഡ് ബാധിതരാണുള്ളത്. ഏറ്റവും കൂടുതൽ വൈറസ്ബാധിതരുള്ള യുഎസ് സംസ്ഥാനം കാലിഫോർണിയയാണ്- 4,53,659. എന്നാൽ, ഫ്ലോറിഡയിലെ ഇരട്ടിയോളം വരും കാലിഫോർണിയയിലെ ജനസംഖ്യ. ഒരിക്കൽ കൊവിഡിന്‍റെ പ്രഭവ കേന്ദ്രമായിരുന്ന ന്യൂയോർക്ക് വൈറസിനെ നിയന്ത്രണത്തിലാക്കി. 4,11,736 കേസുകളാണ് ന്യൂയോർക്കിലുള്ളത്. ഫ്ലോറിഡയിൽ പരിശോധിക്കുന്നവരിൽ ശരാശരി 11 ശതമാനം പേർക്ക് പോസിറ്റീവാകുന്നുണ്ട്. 5,972 പേർ ഇതുവരെ സംസ്ഥാനത്തു മരിച്ചു. വേൾഡോ മീറ്ററിന്‍റെ കണക്കുപ്രകാരം ലോകത്ത് ഇപ്പോൾ 1.64 കോടി കൊവിഡ് ബാധിതരാണുള്ളത്. കൊവിഡ് മരണം 6.52 ലക്ഷമായിട്ടുണ്ട്. ഒരു കോടിയിലേറെ പേർ രോഗമുക്തി നേടി. 43.71 ലക്ഷം രോഗബാധിതരുള്ള അമെരിക്കയെയാണ് ലോകത്ത് ഏറ്റവും മോശമായ രീതിയിൽ കൊവിഡ് ബാധിച്ചിരിക്കുന്നത്. യുഎസിലെ മരണസംഖ്യ 1.49 ലക്ഷത്തിലെത്തിയിട്ടുണ്ട്. 24 ലക്ഷത്തിലേറെ വൈറസ്ബാധിതരുമായി ബ്രസീൽ രണ്ടാം സ്ഥാനത്തുണ്ട്. 87,000ലേറെ പേർ ബ്രസീലിൽ മരിച്ചു. ഇന്ത്യ, റഷ്യ, ദക്ഷിണാഫ്രിക്ക, മെക്സിക്കോ എന്നിവയാണ് രോഗബാധിതരുടെ എണ്ണത്തിൽ തൊട്ടു താഴെയുള്ള രാജ്യങ്ങൾ.