ഫോണിലൂടെ കഥ പറഞ്ഞ് സിനിമ ഷൂട്ട് ചെയ്യ്തു

 

ഒരു കഥയുടെ ആശയം സംവിധായകന്‍ പറയുക, കഥ എഴുന്ന ആള്‍ മറ്റൊരിടത്തിരുന്ന് ഫോണിലൂടെ അത് കഥയാക്കി നല്‍കുക, ഈ രീതിയില്‍ സിനിമ ചിത്രീകരികകുക, അങ്ങനെ നടക്കുമോ, അഥവാ നടന്നാലും എന്താവും ആ സിനിമയുടെ ഗതി. ഒരു സംശയവും വേണ്ട സംപ്പി സൂപ്പര്‍ ഹിറ്റാവും, പക്ഷെ ഒരു നിബന്ധനയുണ്ട കഥ പറയുന്നത് ശ്രീനിവാസനും, കേള്‍ക്കുന്നത് പ്രിയദര്‍ശനും അഭിനയിക്കുന്നത് മോഹന്‍ലാലുമാവണം, സംഗതി നടന്നിട്ടുണ്ട് , 1988ല്‍ പുറത്തിറങ്ങിയ 'വെള്ളാനകളുടെ നാട്' എന്ന സിനിമയാണ് ഇങ്ങനെ ഒരു റെക്കാഡ് ഇട്ടത്. മറ്റൊരു കഥയെ അടിസ്ഥാനമാക്കി ബാലന്‍.കെ. നായരടക്കമുള്ള താരനിരയുമായി ഷൂട്ടിങ് തുടങ്ങാന്‍ നാലു ദിവസം മാത്രം ബാക്കി നില്‍ക്കെയാണ് വെള്ളാനകളുടെ നാട് എന്ന സിനിമയുടെ കഥ മാറ്റിയെഴുതേണ്ടിവന്നത്. ആദ്യത്തെ കഥയത്രപോര, പുതിയ കഥവേണമെന്ന് പ്രിയന്‍ ശ്രീനിവാസനോട് പറയുകയായിരുന്നു. ആ ദിവസം എല്ലാ താരങ്ങളും സാങ്കേതി വിദഗ്ധരും കോഴിക്കോട് മഹാറാണി ഹോട്ടലില്‍ എത്തിയിരുന്നു. തുടര്‍ന്ന് 'മാല്‍ഗുഡി ഡേയ്‌സ്' എന്നനോവലില്‍ ജപ്തി ചെയ്ത റോഡ് റോളര്‍ ആന വലിച്ചുകൊണ്ടുപോവുന്ന രംഗത്തെ അടിസ്ഥാനമാക്കി ഒരു കഥ വികസിപ്പിക്കാമോ എന്ന് ചോദിക്കുകയായിരുന്നു. ആ സമയം ശ്രീനിവാസന്‍ പൊന്‍മുട്ടയിടുന്ന താറാവ് എന്ന സിനിമയുടെ തിരക്കുമായി ഗുരുവായൂരിലെത്തിയിരുന്നു. തുടര്‍ന്ന് ഓരോ ദിവസവും ചിത്രീകരിക്കേണ്ട സീനുകള്‍ തലേന്ന് രാത്രി മഹാറാണിയിലേക്ക് വിളിച്ച് ഫോണ്‍വഴി പറഞ്ഞു കൊടുക്കുകായിരുന്നു. ലൊക്കേഷനിലെ ജനറേറ്റര്‍ സ്റ്റാര്‍ട് ചെയ്താലേ ശ്രീനിവാസന് എഴുത്തു വരൂ എന്നുവരെ അന്ന് താരങ്ങള്‍ പറഞ്ഞിരുന്നു. ഗുരുവായൂര്‍ ഭാഗത്തുനിന്ന് കോഴിക്കോട്ടേക്ക് വരുന്ന ലോറികളില്‍ ചില ദിവസം സീനുകളെഴുതിയ കടലാസ് കൊടുത്തയച്ചിരുന്നു ആ സിനിമയാണ് എക്കാലത്തെയും ഹിറ്റായി ഇപ്പോഴും ചാനലുകളിലും തകര്‍ത്തോടുന്നത്. ഈ സിനിമയില്‍ ഉപയോഗിച്ചിരുന്ന റോഡ് റോളര്‍ കഴിഞ്ഞ ദിവസം ലേലത്തില്‍ പോയിരുന്നു. കുതിരവട്ടം പപ്പുവിന്റെ ''മെയ്ദീനേ.. ആചെറിയേ സ്‌ക്രൂഡ്രൈവറിങ്ങെടുക്ക്...''എന്ന ഡയലോഗ് കേള്‍ക്കുമ്പോള്‍ മലയാളികളുടെ മനസിലേക്ക് ഉരുണ്ടെത്തുന്നത് ആ റോഡ് റോളറാണ്. എന്‍.എന്‍.സാലിഹ് എന്ന കരാറുകാരനാണ് രണ്ടു ലക്ഷം രൂപയ്ക്ക് ലേലത്തിനെടുത്തത്.