സ്വര്‍ണക്കടത്ത് കേസ് അന്വേഷിച്ച ഓഫീസില്‍ കവര്‍ച്ചാശ്രമം

വയലിനിസ്റ്റ് ബാലഭാസ്‌ക്കറിന്റെ സുഹൃത്തുക്കള്‍ ഉള്‍പ്പെട്ട സ്വര്‍ണക്കടത്ത് കേസ് അന്വേഷിച്ച ഡി.ആര്‍.ഐ. യൂണിറ്റിന്റെ ഓഫീസില്‍ കവര്‍ച്ചാശ്രമം. ഞായറാഴ്ച ഉച്ചയ്ക്ക് ഉദ്യോഗസ്ഥര്‍ തിരുവനന്തപുരത്തെ ഓഫീസില്‍ എത്തിയപ്പോഴാണ് കവര്‍ച്ചാശ്രമം നടന്നത് ശ്രദ്ധയില്‍പ്പെട്ടത്. ഉടന്‍ തന്നെ പോലീസില്‍ വിവരമറിയിച്ചു. ഓഫീസിന്റെ മുന്നിലേയും പിന്നിലേയും വാതില്‍ തുറന്ന നിലയിലാണുണ്ടായിരുന്നത്. ഓഫീസിനുള്ളിലെ മേശകളും കസേരുകളും അലങ്കോലമായി കിടക്കുകയായിരുന്നു. പോലീസ് സ്ഥലത്തെത്തി കേസ് രജിസ്റ്റര്‍ ചെയ്ത് അന്വേഷണം ആരംഭിച്ചു. ഇന്നലെ രാത്രിയാണ് മോഷണശ്രമം നടന്നതെന്ന് കരുതുന്നു. ഓഫീസില്‍ നിന്നും രേഖകള്‍ ഒന്നും നഷ്ടപ്പെട്ടിട്ടില്ലെന്ന് ഡിആര്‍ഐ ഉദ്യോഗസ്ഥര്‍ പ്രതികരിച്ചു. ബാലഭാസ്‌കറിന്റെ സുഹൃത്തുക്കളായ പ്രകാശ് തമ്പി, വിഷ്ണു സോമസുന്ദരം കസ്റ്റംസ് ഉദ്യോഗസ്ഥനായ രാധാകൃഷ്ണ പിള്ള എന്നിവരുള്‍പ്പെട്ട 2019-ലെ സ്വര്‍ണക്കടത്ത് കേസ് അന്വേഷിച്ചത് തിരുവനന്തപുരം ഡിആര്‍ഐ യൂണിറ്റ് ആയിരുന്നു. ദിവസങ്ങള്‍ക്ക് മുമ്പാണ് ബാലഭാസ്‌കറിന്റെ മരണവുമായി ബന്ധപ്പെട്ട കേസ് സിബിഐ ഏറ്റെടുത്തത്. ബാലഭാസ്കറിന്റെ മരണം കൊലപാതകമോ എന്ന ചോദ്യം ആവർത്തിച്ച് ഉയരുമ്പോൾ അതേ എന്ന് അടിവരയിടുന്ന തരത്തിലുള്ള ആരോപണങ്ങളും കേസിലെ ദുരൂഹതകളും ഏറുകയാണ്. ഇക്കൂട്ടത്തിൽ ഒരു കെഎസ്ആർടിസി ഡ്രൈവറും അദ്ദേഹം അന്നു നൽകിയ മൊഴിയും കേസിൽ നിർണായകമായിരുന്നു. ഈ മൊഴിയുടെ അടിസ്ഥാനത്തിലാണ് അപകടമരണം എന്ന തരത്തിൽ കേസ് അവസാനിക്കാൻ കാരണവും. എന്നാൽ ഇന്ന് ഈ ഡ്രൈവർ യുഎഇ കോൺസുലേറ്റ് വഴി യുഎഇ സര്‍‌ക്കാരിലെ ഡ്രൈവറായി ജോലി ചെയ്യുന്നുവെന്ന് കേസില്‍ നീതി തേടി പ്രവര്‍ത്തിക്കുന്ന മാധ്യമപ്രവർത്തകൻ അരുൺ കുമാർ പറയുന്നു. ബാലഭാസ്കറിന്‍റേത് അപകടമരണമെന്ന് മൊഴി നൽകിയത് കെഎസ്ആര്‍ടിസി ഡ്രൈവർ സി. അജിയാണ്. ബാലുവിന്റെ കാറിന് പിന്നിൽ ഈ ബസും ഉണ്ടായിരുന്നു. ഈ ഡ്രൈവറുടെ മൊഴി മുഖവിലക്കെടുത്താണ് പൊലീസ് അന്വേഷണം അപകടമെന്ന് ഉറപ്പിച്ചത്. എന്നാൽ ഈ അജി ഇന്ന് യുഎഇ കോണ്‍സുലേറ്റ് വഴി യുഎഇ സര്‍ക്കാരിന്‍റെ കീഴിൽ ബസ് ഡ്രൈവറായതും ഇപ്പോൾ പുറത്തുവന്ന സ്വർണക്കള്ളക്കടത്തും കേസ് കൂട്ടി വായിക്കുമ്പോഴാണ് ദുരൂഹതകൾ വഴിതുറക്കുന്നതെന്ന് ആരോപണം ഉയരുന്നു.