വീണ്ടും പ്രകോപനവുമായി നേപ്പാൾ

കാലാപാനിയും ലിപുലേഖ് ചുരവും ലിംപിയാധുരയും തങ്ങളുടേതാക്കി ഭൂപടം പ്രസിദ്ധീകരിച്ചതിനു പിന്നാലെ ഇന്ത്യയ്ക്കെതിരേ വീണ്ടും പ്രകോപനവുമായി നേപ്പാൾ. ബിഹാറിലെ പശ്ചിമ ചമ്പാരനോടു ചേർന്ന് അതിർത്തിയിൽ ഇന്ത്യയും നേപ്പാളും തമ്മിൽ തർക്കത്തിലുള്ള ഭൂമിയിൽ നേപ്പാൾ സർക്കാർ ഹെലിപ്പാഡ് നിർമിക്കുന്നു. പശ്ചിമചമ്പാരനിൽ വാല്മീകി കടുവ സംരക്ഷണ കേന്ദ്രത്തോടു ചേർന്ന് സശസ്ത്ര സീമാബെല്ലി (എസ്എസ്ബി)ന്‍റെ താരി ഔട്ട് പോസ്റ്റിനു തൊട്ടടുത്താണ് നേപ്പാളിന്‍റെ നിർമാണം. ചെറു കോപ്റ്ററുകൾക്ക് ഇറങ്ങാനും പറന്നുയരാനും സാധിക്കുന്ന ഹെലിപ്പാഡാണ് നേപ്പാൾ നിർമിക്കുന്നതെന്ന് എസ്എസ്ബി 21ാം ബറ്റാലിയൻ രാജദേന്ദ്ര ഭരദ്വാജ്. ‌ ഇന്‍റലിജൻസ് ഏജൻസികൾ നൽകിയ മുന്നറിയിപ്പ് എസ്എസ്ബി സേനാ ആസ്ഥാനത്ത് അറിയിച്ചതിനു തൊട്ടുപിന്നാലെയാണ് നേപ്പാൾ ഹെലിപ്പാഡ് നിർമിച്ചു തുടങ്ങിയത്. ഇതേക്കുറിച്ചു കൂടുതൽ അന്വേഷിച്ചു വരികയാണെന്നു ഭരദ്വാജ്. തർക്കപ്രദേശത്താണ് അവർ നിർമാണം നടത്തുന്നത്. ഇതിന്‍റെ ചിത്രങ്ങളും മറ്റു വിവരങ്ങളും ഉടൻ സേനാ ആസ്ഥാനത്ത് അറിയിക്കും- ഭരദ്വാജ് പറഞ്ഞു.