രാജീവ് കുമാര്‍ തിരഞ്ഞെടുപ്പ് കമ്മീഷ് ണര്‍

രാജിവച്ച അശോക് ലവാസയ്ക്കു പകരം റിട്ടയേഡ് ബ്യൂറോക്രറ്റ് രാജീവ് കുമാർ തെരഞ്ഞെടുപ്പു കമ്മിഷണറാവും. നിയമനത്തിന് രാഷ്ട്രപതി രാം നാഥ് കോവിന്ദ് അനുമതി നൽകി. ഝാർഖണ്ഡ് കേഡറിലെ റിട്ടയേഡ് ഐഎഎസ് ഓഫിസറാണ് 1984 ബാച്ചിലെ അംഗമായ രാജീവ് കുമാർ. അഞ്ചു വർഷ കാലാവധിയാണ് നിയമനത്തിന്. 2024ലെ ലോക്സഭാ തെരഞ്ഞെടുപ്പിൽ കമ്മിഷണറായി രാജീവ് കുമാർ ഉണ്ടാകും. അന്നു മുഖ്യ തെരഞ്ഞെടുപ്പു കമ്മിഷണർ ഇദ്ദേഹമായേക്കും. ആറു വർഷമോ 65 വയസു വരെയോ ആണ് തെരഞ്ഞെടുപ്പു കമ്മിഷണറുടെ കാലാവധി. രാജീവ് കുമാറിന് 2025ൽ 65 വയസാകും. അതുകൊണ്ട് അഞ്ചു വർഷമേ ലഭിക്കൂ. 1960 ഫെബ്രുവരിയിലാണ് രാജീവ് കുമാർ ജനിച്ചത്. പബ്ലിക് എന്‍റർപ്രൈസസ് സെലക്ഷൻ ബോർഡ് (പിഇഎസ്ബി) ചെയർപെഴ്സണാണ് ഇപ്പോൾ രാജീവ് കുമാർ. 2023 ഏപ്രിൽ 28നാണ് ഇതിന്‍റെ കാലാവധി അവസാനിക്കേണ്ടത്. 2017 സെപ്റ്റംബർ ഒന്നു മുതൽ 2020 ഫെബ്രുവരി അവസാനം വരെ ധനകാര്യ സെക്രട്ടറിയായിരുന്നു ഇദ്ദേഹം. ഏപ്രിൽ 29നാണ് പിഇഎസ്ബി തലപ്പത്തു വന്നത്. 2012 മാർച്ച് മുതൽ കേന്ദ്ര സർക്കാരിന്‍റെ വിവിധ മന്ത്രാലയങ്ങളിൽ പ്രവർത്തിച്ചിട്ടുണ്ട്. പെഴ്സണൽ മന്ത്രാലയത്തിലും പ്രവർത്തിച്ചു. ബാങ്കിങ്, ബ്യൂറോക്രസി മേഖലകളിൽ വിവിധ പരിഷ്കാരങ്ങൾ കൊണ്ടുവന്നിട്ടുണ്ട് കുമാർ. എസ്ബിഐ അടക്കം പൊതുമേഖലാ ബാങ്കുകൾ ഏറെയും നഷ്ടത്തിലായിരുന്നപ്പോഴാണ് 2017 സെപ്റ്റംബറിൽ അദ്ദേഹം ഫൈനാൻഷ്യൽ സർവീസസ് ഡിപ്പാർട്ട്മെന്‍റിൽ സെക്രട്ടറിയായി ചുമതലയേറ്റത്. ബാങ്കിങ് മേഖലയിൽ നിരവധി പരിഷ്കാരങ്ങൾ ഇദ്ദേഹത്തിന്‍റെ കാലത്തുണ്ടായി. പൊതുമേഖലാ ബാങ്കുകളുടെ ലയന തീരുമാനത്തിൽ നിർണായക പങ്കു വഹിച്ചു.