അലക്സി നവല്‍നിയ്ക്കു രാസവിഷ പ്രയോഗം

റഷ്യയിലെ പ്രതിപക്ഷത്തിന്റെ കരുത്തനായ നേതാവ് അലക്സി നവല്‍നിയ്ക്കു നേരേ നടന്നത് രാസവിഷപ്രയോഗമാണെന്ന് ജര്‍മനി. നൊവിചോക് എന്ന കെമിക്കൽ ഏജന്റാണ് പ്രയോഗിച്ചിരിക്കുന്നത്. പരിശോധനയില്‍ അദ്ദേഹത്തിന്റെ ആന്തരികാവയവത്തില്‍ നൊവിചോക് വിഭാഗത്തില്‍പ്പെടുന്ന വിഷാംശം സ്ഥിരീകരിച്ചതായും ജര്‍മനി അറിയിച്ചു. സൈബീരിയയില്‍നിന്ന് മോസ്കോയിലേക്ക് മടങ്ങുന്നതിനിടെ വിമാനത്താവളത്തില്‍വച്ച് നവല്‍നി അസുഖബാധിതനായത്. തുടര്‍ന്ന് വിമാനം തിരിച്ചിറക്കി സൈബീരിയയില്‍ ആശുപത്രിയില്‍ പ്രവേശിപ്പിക്കുകയും വിദഗ്ധചികിത്സയ്ക്കായി ജര്‍മനിയിലേക്ക് കൊണ്ടുവരുകയുമായിരുന്നു. അന്നുമുതല്‍ അബോധാവസ്ഥയിലാണ് നവല്‍നി. റഷ്യന്‍ പ്രസിഡന്റ് വ്ളാദിമിര്‍ പുടിന്റെ അറിവോടെയാണ് നവാല്‍നിക്കെതിരെ വിഷ പ്രയോഗം നടന്നിരിക്കുന്നതെന്നാണ് നവാല്‍നിയോട് അടുത്ത വൃത്തങ്ങള്‍ ആരോപിക്കുന്നത്. ഫ്രാന്‍സ്, ജര്‍മനി അടക്കമുള്ള രാജ്യങ്ങള്‍ സംഭവം അന്വേഷിക്കണമെന്ന് റഷ്യയോട് ആവശ്യപ്പെട്ടിരിക്കുകയാണ്. പുതിയ കണ്ടെത്തല്‍ സംഭവത്തിന്റെ ഗൗരവം വര്‍ധിപ്പിച്ചിരിക്കുകയാണെന്ന് ജര്‍മന്‍ സര്‍ക്കാര്‍ പറഞ്ഞു. ഇക്കാര്യത്തില്‍ റഷ്യ വിശദീകരണം നല്‍കണമെന്നും ആവശ്യപ്പെട്ടു. ചികിത്സയുടെ അടുത്ത ഘട്ടത്തെക്കുറിച്ച് ചര്‍ച്ചചെയ്യാന്‍ ജര്‍മന്‍ ചാന്‍സലര്‍ മെര്‍ക്കല്‍ പ്രത്യേകയോഗം വിളിച്ചു. എന്നാല്‍, ആരോപണം റഷ്യ നിഷേധിച്ചു.