എന്‍ഐഎ അന്വേഷണം സി പി എമ്മില്‍ എത്തിയില്ല , സിബിഐ യെ എത്തിക്കാന്‍ ബിജെപിയും കോണ്‍ഗ്രസും

ഏറെ പ്രതീക്ഷയോടെ കാത്തിരുന്ന സ്വര്‍ണകേസ് അന്വേഷണത്തില്‍ സിപിഎമ്മിനെ ഇതുവരെ കുരുക്കാന്‍ സാധിക്കാത്തതിനാല്‍ മറ്റേതെങ്കിലും കേസില്‍ ഒരു സി ബി ഐ അന്വേഷണം നടത്തിക്കാനുള്ള വഴി തേടി കൊ ലി ബി സഖ്യം. എന്‍ ഐ എ , എന്‍ഫാഴ്‌സ്‌മെന്റ് , കസ്റ്റംസ് എന്നീ മൂന്ന് ഏജന്‍സികള്‍ ശ്രമിച്ചിട്ടും ഇതുവരെ സി പി എം കേന്ദ്രങ്ങളിലേക്ക് ഒരു അന്വേഷണവും കടന്നു ചെന്നില്ല. ഇനി ചെന്നാലും രാഷ്ട്രീയ പ്രേരിതം എന്ന് ജനം പറയും എന്ന ഭയവും ഇവര്‍ക്കുണ്ട്. അതിനുമപ്പുറം ലീഗ് ബന്ധങ്ങള്‍ യു ഡി എഫിനും , മന്ത്രി മുരളീധരന്റെ പ്രസ്താവനകള്‍ ബി ജെ പി ക്കും തിരിച്ചടി ആയി അതിനാലാണ് പുതിയ ആലോചന. ഇതിനുവേണ്ടി പരാതികള്‍ നല്‍കാനും കോടതിയെ സമീപിക്കാനുമാണ് നീക്കം. കസ്റ്റംസും ഇഡിയും അന്വേഷിക്കുന്ന കേസുകളിലെ ക്രിമിനല്‍ ഗൂഢാലോചനയും മറ്റുമാകും സിബിഐക്ക് പരിശോധിക്കാന്‍കഴിയുക. സ്വര്‍ണ്ണ കടത്തിന് ലഹരി മരുന്ന് മാഫിയയുമായും ബന്ധമുണ്ട്. വിദേശ നയതന്ത്ര ചട്ടങ്ങളും ലംഘിച്ചു. ഇതില്‍ എല്ലാം കേസെടുക്കാന്‍ സിബിഐയ്ക്ക് കഴിയും. ഈ സാഹചര്യത്തിലാണ് സിബിഐയുടെ സാധ്യതകള്‍ കേന്ദ്രം പരിശോധിക്കുന്നത്. പക്ഷെ നിലവിലെ ഏജന്‍സികള്‍ ഇതില്‍ കൂടുതല്‍ കണ്ടത്തലുകള്‍ ഒന്നും നടത്താത്തിനാല്‍ കോടതിയില്‍ നിന്ന് തിരിച്ചടി കിട്ടുമോ എന്ന ഭീതിയുമുണ്ട്. ബിജെപി യുടെ ചാനല്‍ മുഖങ്ങളാണ് ഇതിനുവേണ്ടി ശ്രമം നടത്തുന്നത്. അവര്‍ക്ക് പിന്‍തുണ നല്‍കുന്ന മാധ്യമങ്ങളിലൂടെ ഇതിനായി പ്രചരണവും തുടങ്ങിക്കഴിഞ്ഞു. കോണ്‍ഗ്രസ് നീക്കങ്ങളുടെ ഭാഗമായി നേരിട്ട് പരാതി സി ബി ഐക്ക് നല്‍കി കഴിഞ്ഞു. ലീഗ് നേതാവ് കോടതിയെ സമീപിക്കാനുള്ള ശ്രമത്തിലാണ്. വടക്കാഞ്ചേരിയിലെ ലൈഫ് മിഷന്‍ പദ്ധതിയുമായി ബന്ധപ്പെട്ട് സിബിഐ അന്വേഷണത്തിനു വേണ്ടി അനില്‍ അക്കര എംഎല്‍എയാണ് കൊച്ചി യൂണിറ്റിലെ സിബിഐ എസ്പിക്കു പരാതി നല്‍കിയത്. ലൈഫ് മിഷന്‍ അധ്യക്ഷനായ മുഖ്യമന്ത്രി, സഹ അധ്യക്ഷനായ തദ്ദേശമന്ത്രി, മുന്‍ സിഇഒ, ഇപ്പോഴത്തെ സിഇഒ, സ്വര്‍ണക്കള്ളക്കടത്തു കേസ് പ്രതികളായ സ്വപ്ന, സരിത്, സന്ദീപ്, യുണിടാക് എംഡി എന്നിവര്‍ക്കെതിരെ കേസെടുക്കണമെന്നാണ് ആവശ്യം. ഫോറിന്‍ കോണ്‍ട്രിബ്യൂഷന്‍ ആക്ടിന്റെ (2010) ലംഘനം നടന്നതായാണ് പരാതിയില്‍ പറയുന്നത്. സി ബി ഐ വരുന്നു എന്നതിന്റെ പ്രചരണം കേരളത്തില്‍ ബിജെപി ക്കും കോണ്‍ഗ്രസിനും വേണ്ടി ഒരു പോലെ പ്രവര്‍ത്തിക്കുന്ന ചില ചെറുകിട പി ആര്‍ കമ്പനികളാണ് ഏറ്റെടുത്തിരിക്കുന്നത്. കോട്ടയം സ്വദേശിയായ ഒരു പത്രപ്രവര്‍ത്തകന്‍ ബി ജെ പി ക്യാമ്പിനുവേണ്ടിയും , കൊല്ലം സ്വദേശിയായ ഒരു റിട്ടയേര്‍ഡ് പത്രക്കാരന്‍ പ്രതിപക്ഷ നേതാവിന്റെ ക്യാമ്പില്‍ നിന്നും ഇതിനുവേണ്ടിയുള്ള നീക്കം തുടങ്ങി.