ഡൊണാൾഡ് ട്രംപിന് കോവിഡ് 19

അമേരിക്കൻ പ്രസിഡന്റ് ഡൊണാൾഡ് ട്രംപിന് കോവിഡ് 19 സ്ഥീരികരിച്ചു. ഭാര്യ മെലാനിയക്കും രോഗം ബാധിച്ചിട്ടുണ്ട്. നേരത്തെ ഡൊണാൾഡ് ട്രംപിന്റെ ഉപദേഷ്ടാവായ ഹോപ് ഹിക്സിന് കോവിഡ് സ്ഥിരീകരിച്ചിരുന്നു. രോഗ ലക്ഷണങ്ങളുള്ള ഹിക്സ് ക്വാറന്റീൽ കഴിയുകയാണ്. ഹിക്സിന് രോഗം സ്ഥിരീകരിച്ചതോടെ പ്രസിഡന്റ് ട്രംപും ഭാര്യ മെലാനിയയും ക്വാറന്റീനിൽ കഴിയുകയും ചെയ്തിരുന്നു. തുടർന്ന് നടത്തിയ പരിശോധനയിലാണ് ഇരുവരും കോവിഡ് പോസിറ്റീവാണെന്ന് വ്യക്തമായത്.

താൻ രോഗബാധിതനായ വിവരം ട്രംപ് ട്വിറ്ററിലൂടെ പങ്കുവെച്ചു. ഇരുവരും ക്വാറന്റീനിൽ പ്രവേശിച്ചതായും രോഗത്തെ ഒരുമിച്ചു നേരിടാമെന്നും ട്രംപ് ട്വിറ്ററിൽ കുറിച്ചു. എയർ ഫോഴ്സ് വണിൽ ട്രംപിനെ സ്ഥിരമായി അനുഗമിക്കുന്ന ഏറ്റവും അടുത്ത ഉപദേഷ്ടാക്കളിൽ ഒരാളാണ് ഹോപ് ഹിക്സ്. ദിവസങ്ങൾക്ക് മുമ്പ് ക്ലീവ്ലാന്റിലെ പ്രസിഡന്റ് സ്ഥാനാർത്ഥികളുടെ സംവാദത്തിൽ പങ്കെടുത്ത ട്രംപിന്റെ ഔദ്യോഗിക സംഘത്തിലും ഹോപ് ഹിക്സ് അംഗമായിരുന്നു.

കോവിഡ് ഒരു സാധാരണരോഗമാണെന്നായിരുന്നു ട്രംപിന്റെ നേരത്തേയുള്ള നിലപാട്. മാസ്‌ക് ധരിക്കാൻപോലും അദ്ദേഹം ആദ്യം കൂട്ടാക്കിയിരുന്നില്ല. കോവിഡ് വ്യാപനം രൂക്ഷമായ അമേരിക്കയിൽ കോവിഡ് മരണം 2 ലക്ഷം കവിഞ്ഞതിനിടെയാണ് പ്രസിഡന്റിനും ഭാര്യയ്ക്കും കോവിഡ് സ്ഥിരീകരിക്കുന്നത്.