തിരൂര്‍ കൂട്ടായില്‍ രണ്ട് സംഘങ്ങള്‍ തമ്മിലുണ്ടായ സംഘര്‍ഷത്തില്‍ ഒരാള്‍ വെട്ടേറ്റ് മരിച്ചു, രണ്ടുപേരുടെ നില ഗുരുതരം

തിരൂരില്‍ രണ്ട് സംഘങ്ങള്‍ തമ്മിലുണ്ടായ സംഘര്‍ഷത്തില്‍ യുവാവ് വെട്ടേറ്റ് മരിച്ചു. കൂട്ടായി കടപ്പുറത്തെ ചേലക്കല്‍ യാസര്‍ അറഫാത്താണ് മരിച്ചത്. രണ്ടുപേരുടെ നില അതീവ ഗുരുതരം. രണ്ടുപേരും കോഴിക്കോട് മെഡിക്കല്‍ കോളെജില്‍ ചികിത്സയിലാണ്.
ഇന്നലെ രാത്രി പതിനൊന്നു മണിയോടെയാണ് യാസര്‍ അറഫാത്ത് കൊല്ലപ്പെട്ടത്. രണ്ട് പേരുടെ നില അതീവ ഗുരുതരമാണ്. പൊതുസ്ഥലത്ത് കൂട്ടം കൂടിയിരിക്കുന്നതിനെ ചൊല്ലി അയല്‍വാസികള്‍ തമ്മിലുണ്ടായ സംഘര്‍ഷത്തിലാണ് യാസര്‍ അറഫാത്ത് കൊല്ലപ്പെട്ടത്. യാസറും സുഹൃത്തുക്കളും വീടിനു സമീപത്തെ എല്‍.പി സ്‌കൂള്‍ മൈതാനത്ത് സ്ഥിരമായി കൂട്ടം കൂടിയിരിക്കുന്നത് പതിവാണ്.
എന്നാല്‍ തൊട്ടടുത്ത വീട്ടിലെ പുരക്കല്‍ അബൂബക്കര്‍ എന്നയാളും മക്കളും കൂട്ടം കൂടിയിരിക്കരുതെന്ന് യാസറിനും സുഹൃത്തുക്കള്‍ക്കും നിരവധി തവണ താക്കീത് നല്‍കിയിട്ടുണ്ട്.
സംഘര്‍ഷം നടന്ന രാത്രിയിലും ഇത് സംബന്ധിച്ച് ഇരുകൂട്ടരും തമ്മിലുണ്ടായ തര്‍ക്കമാണ് യാസറിന്റെ മരണത്തില്‍ കലാശിച്ചത്. വാക്കുതര്‍ക്കത്തെത്തുടര്‍ന്ന് ആ സമയം അവിടെ നിന്ന് മടങ്ങിപ്പോയ യാസര്‍ അറഫാത്തും സുഹൃത്തുക്കളും പിന്നീട് സംഘടിച്ചെത്തി വെല്ലുവിളി നടത്തിയെന്നാണ് പൊലീസ് പറയുന്നത്.