രാജ്യത്തെ കൊവിഡ് ബാധിതരുടെ എണ്ണം 70 ലക്ഷത്തിലേക്ക്

രാജ്യത്തെ കൊവിഡ് ബാധിതരുടെ എണ്ണം 70 ലക്ഷത്തിലേക്ക് അടുക്കുന്നു. മഹാരാഷ്ട്രയില്‍ രോഗബാധിതരുടെ എണ്ണം 15 ലക്ഷം കടന്നു. നവരാത്രി ആഘോഷങ്ങള്‍ അനുവദിക്കില്ലെന്ന് ഗുജറാത്ത് സര്‍ക്കാര്‍ വ്യക്തമാക്കി. ചെന്നൈയില്‍ കണ്ടെന്റ്മെന്റ് സോണുകളുടെ എണ്ണം 70 ആയി ഉയര്‍ന്നു. മഹാരാഷ്ട്ര, കര്‍ണാടക, കേരളം, ആന്ധ്ര, തമിഴ്നാട്, ഉത്തര്‍പ്രദേശ് സംസ്ഥാനങ്ങളില്‍ രോഗവ്യാപനം തീവ്രമായി. മഹാരാഷ്ട്രയില്‍ 12,134 പേര്‍ക്ക് കൂടി കൊവിഡ് സ്ഥിരീകരിച്ചതോടെ ആകെ രോഗബാധിതര്‍ 15,06,018 ആയി. 302 പേര്‍ കൂടി മരിച്ചതോടെ ആകെ മരണം 39,732 ആയി ഉയര്‍ന്നു. മുംബൈയില്‍ 2287 പുതിയ കേസുകളും 47 മരണവുമാണ് റിപ്പോര്‍ട്ട് ചെയ്തത്. ആകെ രോഗബാധിതര്‍ 225,048ഉം, മരണം 9,340ഉം ആയി. കര്‍ണാടകയില്‍ 24 മണിക്കൂറിനിടെ 10,913 പോസിറ്റീവ് കേസുകളും, 114 മരണവും റിപ്പോര്‍ട്ട് ചെയ്തു. സംസ്ഥാനത്തെ ആകെ കേസുകള്‍ 690,269. ആകെ മരണം 9789. തമിഴ്നാട്ടില്‍ 5185 പുതിയ കേസുകളും 68 മരണവുമാണ് റിപ്പോര്‍ട്ട് ചെയ്തത്. ആന്ധ്രയില്‍ 5145 പുതിയ കേസുകളും 31 മരണവും റിപ്പോര്‍ട്ട് ചെയ്തു. ഉത്തര്‍പ്രദേശില്‍ 3249ഉം, ഒഡിഷയില്‍ 2697ഉം, ഡല്‍ഹിയില്‍ 2860ഉം പുതിയ കേസുകള്‍ റിപ്പോര്‍ട്ട് ചെയ്തു.