തൃശൂര്‍ സനൂപ് വധക്കേസ് മൂന്നുപേര്‍ അറസ്റ്റില്‍

സി.പി.എം. പുതുശ്ശേരി കോളനി സെക്രട്ടറി പി.യു. സനൂപിനെ കുത്തി കൊലപ്പെടുത്തിയ കേസില്‍ മൂന്നുപേര്‍ കൂടി അറസ്റ്റിലായി. ചിറ്റിലങ്ങാട് സ്വദേശികളായ അറണാംകോട്ട് അഭയജിത്ത് (19), ആവേന്‍ ശ്രീരാഗ് (24), കരിമ്പനക്കല്‍ സതീഷ് (മരുമോന്‍-35) എന്നിവരെയാണ് കുന്നംകുളം എസിപി ടി.എസ്. സിനോജിന്റെ നേതൃത്വത്തിലുള്ള അന്വേഷണ സംഘം അറസ്റ്റ് ചെയ്തത്. കൊലപാതകത്തില്‍ നേരിട്ട് ബന്ധമുള്ളവരാണ് അറസ്റ്റിലായ അഭയജിത്തും ശ്രീരാഗും. ഇരുവരും ആയുധം ഉപയോഗിച്ച് സനൂപിനെയും കൂടെയുണ്ടായിരുന്നവരെയും ആക്രമിച്ചതായി പറയുന്നു. കേസിലെ ഒന്നാം പ്രതിയായ തറയില്‍ നന്ദന്റെ സഹോദരി പുത്രനാണ് ശ്രീരാഗ്. കഴിഞ്ഞ ഞായറാഴ്ചയാണ് ചിറ്റിലങ്ങാടു വച്ച് സി.പി.എം. പുതുശ്ശേരി കോളനി ബ്രാഞ്ച് സെക്രട്ടറി പി.യു. സനൂപിനെ കുത്തി കൊലപ്പെടുത്തിയത്. സംഭവത്തിന് ശേഷം ചെമ്മന്തിട്ട ചീര്‍പ്പിന് സമീപം ഒളിവില്‍ കഴിയുന്നതിനിടെയാണ് ഇന്നലെ ഉച്ചയോടെ മൂവരെയും പൊലീസ് പിടികൂടിയത്. ഇതോടെ സംഭവത്തില്‍ ആറു പേര്‍ പിടിയിലായി. കൊലപാതക കേസില്‍ ഇനിയും പ്രതികളെ പിടികൂടാനുണ്ടെന്നും എസിപി വ്യക്തമാക്കി. പ്രതികളെ ഇന്ന് സംഭവസ്ഥലത്ത് എത്തിച്ച് തെളിവെടുപ്പ് നടത്തും. കേസില്‍ പൊലീസ് നേരത്തെ അറസ്റ്റ് ചെയ്ത ഒന്നാം പ്രതി നന്ദനെ കൂടുതല്‍ ചോദ്യം ചെയ്യുന്നതിനായി പൊലീസ് കസ്റ്റഡിയില്‍ വാങ്ങി.