റഷ്യയുടെ രണ്ടാം കോവിഡ് വാക്സിന് അംഗീകാരം

സ്പുട്നിക്-5നു പിന്നാലെ രണ്ടാമത്തെ കോവിഡ് വാക്സീനും അംഗീകാരം നല്‍കാന്‍ റഷ്യ. പുതിയ വാക്സീന് 15ന് അംഗീകാരം നല്‍കുമെന്നാണ് റിപ്പോര്‍ട്ട്. സ്പുട്നിക്കിന്റെ ഫലപ്രാപ്തിയെക്കുറിച്ച് ഇന്ത്യയില്‍ വിപുലമായ പഠനം നടത്തണമെന്ന ഡോ. റെഡ്ഡീസ് ലബോറട്ടറീസിന്റെ ആവശ്യം കഴിഞ്ഞദിവസം ഇന്ത്യന്‍ അധികൃതര്‍ തള്ളിയിരുന്നു. സ്പുട്നിക് വാക്സീന്റെ രണ്ടുംമൂന്നും ഘട്ട മനുഷ്യ പരീക്ഷണത്തിനു വേണ്ടി പുതിയ നിര്‍ദേശങ്ങള്‍ സമര്‍പ്പിക്കാന്‍ വിതരണക്കാരായ റഷ്യന്‍ ഡയറക്ട് ഇന്‍വെസ്റ്റ്മെന്റ് ഫണ്ടിന്റെ ഇന്ത്യന്‍ പങ്കാളികളായ ഡോ. റെഡ്ഡീസ് ലബോറട്ടറീസിനോടു കഴിഞ്ഞദിവസം കേന്ദ്ര ഡ്രഗ് സ്റ്റാന്‍ഡേര്‍ഡ് കണ്‍ട്രോള്‍ ഓര്‍ഗനൈസേഷന്‍ ആവശ്യപ്പെട്ടു. സൈബീരിയയിലെ വെക്ടര്‍ ഇന്‍സ്റ്റിറ്റ്യൂട്ടാണ് രണ്ടാമത്തെ വാക്‌സീന്‍ വികസിപ്പിച്ചത്. കഴിഞ്ഞ മാസമാണ് ആദ്യഘട്ട മനുഷ്യ പരീക്ഷണം പൂര്‍ത്തിയായത്. 15ന് വാക്സീന് അംഗീകാരം ലഭിക്കുമെന്നാണു കരുതുന്നതെന്നു വെക്ടര്‍ ഇന്‍സ്റ്റിറ്റ്യൂട്ട് അറിയിച്ചു. ആവശ്യമായ പരീക്ഷണങ്ങള്‍ പൂര്‍ത്തിയാക്കാതെയാണ് സ്പുട്നിക് വാക്സീന്‍ പുറത്തിറക്കിയതെന്ന വിമര്‍ശനം നേരിടുന്നതിനിടെയാണ് റഷ്യ രണ്ടാം വാക്സീനുമായി രംഗത്തെത്തുന്നത്.