‘അവരെന്നെ കൊല്ലും.! എന്നിട്ട് അതിനെ ആത്മഹത്യയാക്കി മാറ്റും’ : പ്രധാനമന്ത്രിയോട് സഹായാഭ്യര്‍ത്ഥനയുമായി പായല്‍ ഘോഷ്

ബോളിവുഡിലെ മാഫിയ ഗ്യാംഗ് തന്നെ കൊലപ്പെടുത്തുമെന്നും, എന്നിട്ട് അത് ആത്മഹത്യയോ മറ്റെന്തെങ്കിലുമോ ആയി ചിത്രീകരിക്കുമെന്നുമാണ് പായല്‍ ഘോഷ് ട്വിറ്ററില്‍ പോസ്റ്റ് ചെയ്തത്. ബോളിവുഡ് സംവിധായകന്‍ അനുരാഗ് കശ്യപിനെതിരെ നടി നേരത്തെ ലൈംഗികാരോപണം നടത്തിയിരുന്നു. 2013-ലുണ്ടായ സംഭവങ്ങളെ ഉദ്ധരിച്ചു നടത്തിയ മീടൂ ആരോപണത്തിനു ശേഷം, അനുരാഗ് തന്നെ പീഡിപ്പിച്ചതായുള്ള പായലിന്റെ പരാതിയിന്മേല്‍ പോലീസ് കേസ് രജിസ്റ്റര്‍ ചെയ്തിരുന്നു. ഇതിനുശേഷമാണ് തന്നെ അടിച്ചമര്‍ത്താന്‍ ശ്രമിക്കുന്നുണ്ടെന്നും, താന്‍ കൊല്ലപ്പെടുമെന്നും കാണിച്ച് നടി ട്വിറ്ററില്‍ പോസ്റ്റിട്ടത്. അനുരാഗ് കശ്യപുമായി ബന്ധമുള്ള മാഫിയ ഗ്യാങ്ങുകളെക്കുറിച്ചുള്ള സൂചന നല്‍കിയിരിക്കുന്ന ട്വിറ്റര്‍ പോസ്റ്റില്‍ പ്രധാനമന്ത്രിയോടൊപ്പം ദേശീയ വനിതാ കമ്മീഷന്‍ ചീഫ് രേഖ ശര്‍മയേയും പായല്‍ ട്വീറ്റ് ചെയ്തിട്ടുണ്ട്. സംഭവത്തില്‍ അടിയന്തരമായി ഇടപെടാനും തന്നെ രക്ഷിക്കാനുമാണ് നടി അപേക്ഷിച്ചിരിക്കുന്നത്.