ത്രിപുര ബിജെപിയില്‍ പൊട്ടിത്തെറി, ബിപ്ലബിനെ മുഖ്യമന്ത്രി സ്ഥാനത്ത് നിന്ന് മാറ്റണമെന്ന് ബിജെപി യിലെ കൂടുതല്‍ എംഎല്‍എമാര്‍

ബിപ്ലബ് കുമാര്‍ ദേബിനെ ത്രിപുര മുഖ്യമന്ത്രി സ്ഥാനത്ത് നിന്ന് മാറ്റണമെന്ന ആവശ്യവുമായി ബിജെപി എംഎല്‍എമാര്‍ രംഗത്ത്. ഏഴ് എംഎല്‍എമാരാണ് പരാതിയുമായി ഡല്‍ഹിയിലെത്തിയത്. ബിപ്ലബിന്റേത് ഏകാധിപത്യ ശൈലിയാണെന്നും വേണ്ടത്ര ഭരണ പരിചയമില്ലെന്നും ജനപ്രീതിയില്ലെന്നുമാണ് എംഎല്‍എമാരുടെ വിമര്‍ശനം. ത്രിപുരയില്‍ ബിജെപിക്ക് ഭരണത്തുടര്‍ച്ച വേണമെങ്കില്‍ ബിപ്ലബ് കുമാറിനെ മുഖ്യമന്ത്രി സ്ഥാനത്ത് നിന്ന് മാറ്റണമെന്നാണ് എംഎല്‍എമാര്‍ പറയുന്നത്.
സുധിപ് റോയ് ബര്‍മന്റെ നേതൃത്വത്തിലാണ് ബിജെപി എംഎല്‍എമാര്‍ ദേശീയ നേതൃത്വത്തെ കാണാനെത്തിയത്. സുശാന്ത ചൗധരി, ആശിഷ് സാഹ, ആശിഷ് ദാസ്, ദിവ ചന്ദ്ര, ബര്‍ബ് മോഹന്‍, പരിമള്‍ ദേബ്, റാം പ്രസാദ് എന്നിവരാണ് ഡല്‍ഹിയിലെത്തിയ മറ്റ് ബിജെപി എംഎല്‍എമാരെന്ന് ഇന്ത്യന്‍ എക്‌സ്പ്രസ് റിപ്പോര്‍ട്ട് ചെയ്യുന്നു. ബിരേന്ദ്ര കിഷോര്‍, ബിപ്ലബ് ഘോഷ് എന്നീ രണ്ട് എംഎല്‍എമാരുടെ പിന്തുണയും തങ്ങള്‍ക്ക് ഉണ്ടെന്നും കോവിഡ് ബാധിച്ചതിനാലാണ് അവര്‍ വരാതിരുന്നതെന്നും വിമത എംഎല്‍എമാര്‍ അവകാശപ്പെടുന്നു. അമിത് ഷാ, ജെ.പി. നദ്ദ എന്നീ നേതാക്കളെ കണ്ട് ത്രിപുരയിലെ അവസ്ഥ ധരിപ്പിക്കുമെന്ന് എംഎല്‍എമാര്‍ അറിയിച്ചു. പ്രധാനമന്ത്രിയെ കണ്ട് കാര്യങ്ങള്‍ ധരിപ്പിക്കാനും ഇവര്‍ ആലോചിക്കുന്നുണ്ട്.