മധ്യപ്രദേശില്‍ ബലാത്സംഗംത്തിനിരയായ പെണ്‍കുട്ടി സ്വയം തീകൊളുത്തി; കേസില്‍ പ്രായപൂര്‍ത്തിയാവാത്ത ആണ്‍കുട്ടി പിടിയില്‍

ബലാത്സംഗത്തിന് ഇരയായ പ്രായപൂര്‍ത്തിയാകാത്ത പെണ്‍കുട്ടി സ്വയം തീ കൊളുത്തിയ സംഭവത്തില്‍ പ്രായപൂര്‍ത്തിയാകാത്ത ആണ്‍കുട്ടി പിടിയില്‍. മധ്യപ്രദേശിലെ രേവാ ജില്ലയിലെ അത്‌റൈലാ ഗ്രാമത്തിലാണ് സംഭവം. ഏഴാം തിയതിയാണ് പെണ്‍കുട്ടി തീകൊളുത്തി ആത്മഹത്യ ചെയ്യാന്‍ ശ്രമിച്ചത്. പെണ്‍കുട്ടിയുടെ കുടുംബം നല്‍കിയ പരാതിയുടെ അടിസ്ഥാനത്തിലാണ് പ്രായപൂര്‍ത്തിയാവാത്ത പ്രതിയെ പൊലീസ് അറസ്റ്റ് ചെയ്തത്. പെണ്‍കുട്ടിയും ആണ്‍കുട്ടിയും തമ്മില്‍ പ്രണയത്തിലായിരുന്നുവെന്നും ഇതിനിടെ ആണ്‍കുട്ടി ബലാത്സംഗം ചെയ്തതിനെ തുടര്‍ന്നുള്ള വിഷമത്തില്‍ പെണ്‍കുട്ടി സ്വയം തീ കൊളുത്തി ജീവനൊടുക്കാന്‍ ശ്രമിക്കുകയായിരുന്നുവെന്നുമാണ് കേസ് അന്വേഷിക്കുന്ന റേവ ഡിവൈഎസ്പി ബിപി സിങ് പറയുന്നത്.
പെണ്‍കുട്ടി ബലാത്സംഗത്തിന് ഇരയായെന്ന മൊഴി ലഭിച്ചിട്ടുണ്ടെന്നും ഇക്കാര്യം ഡോക്ടര്‍മാരുടെ പരിശോധനയില്‍ വ്യക്തമാകുമെന്നും അറസ്റ്റിലായ ആണ്‍കുട്ടിയെ ഉടനെ ജുവനൈല്‍ കോടതി മുന്‍പാകെ ഹാജരാക്കുമെന്നും ഡിവൈഎസ്പി അറിയിച്ചു. ആത്മഹത്യയ്ക്ക് ശ്രമിച്ച പെണ്‍കുട്ടി ?ഗുരുതരമായി പൊള്ളലേറ്റ് ഇപ്പോഴും ചികിത്സയിലാണ്.