ഇന്ത്യ ചൈന ഏഴാം സൈനീക തല ചര്‍ച്ച ഇന്ന്

ഇന്ത്യചൈന ഏഴാം സൈനിക തല ചര്‍ച്ച ഇന്ന് നടക്കും. സൈനിക പിന്മാറ്റം സംബന്ധിച്ച നിലപാട് ചൈന ഇനിയും വ്യക്തമാക്കാത്ത സാഹചര്യത്തില്‍ ചര്‍ച്ചയില്‍ നിന്ന് വലിയ അത്ഭുതങ്ങള്‍ ഒന്നും ഇത്തവണയും പ്രതീക്ഷിക്കാനാകില്ല. പാം ഗോംഗ് അടക്കമുള്ള മേഖലകളില്‍ നിന്ന് ബോധ്യപ്പെടുന്ന രീതിയില്‍ പിന്മാറ്റം നടത്തിയാല്‍ മാത്രമേ ഇന്ത്യയും സൈനിക വിന്യാസം കുറയ്ക്കൂ എന്ന നിലപാടാകും ഇന്ത്യ ചര്‍ച്ചയില്‍ സ്വീകരിക്കുക.
പിന്മാറ്റം സംബന്ധിച്ച കൃത്യമായ നിലപാട് അറിയിക്കാനുള്ള ഇന്ത്യന്‍ നിര്‍ദ്ദേശത്തില്‍ ചൈന മൗനം തുടരുകയാണ്. ഇന്നത്തെ ഏഴാം വട്ട സൈനിക തല ചര്‍ച്ചയില്‍ ഇന്ത്യയ്ക്ക് സമമായി ചൈനയും വിദേശകാര്യ മന്ത്രാലയ ഉദ്യോഗസ്ഥനെ ആദ്യമായ് ഉള്‍പ്പെടുത്തി. ലഫ്റ്റനന്റ് ജനറല്‍മാരായ ഹരീന്ദര്‍ സിംഗ് പി.ജി.കെ മേനോന്‍ എന്നിവരാകും ചര്‍ച്ചയിലെ ഇന്ത്യയുടെ സൈനിക പ്രതിനിധികള്‍. ഇന്ത്യയെ പ്രതിനിധീകരിച്ച് ഇത്തവണയും വിദേശകാര്യ മന്ത്രാലയത്തിലെ ജോയിന്റ് സെക്രട്ടറി നവീന്‍ ശ്രീവാസ്തവ പങ്കെടുക്കും. ചുഷൂല്‍ മോള്‍ഡോയില്‍ വച്ചാണ് ചര്‍ച്ച. ഫിംഗര്‍ മേഖലകളില്‍ നിന്നുള്ള പിന്മാറ്റം സംബന്ധിച്ച ചൈന ക്യത്യമയ വിവരങ്ങള്‍ നല്‍കണമെന്ന് ഇന്ത്യ ആവശ്യപ്പെടും.