ഇന്ത്യന്‍ റെയില്‍വേ ശൃംഖലയില്‍ അതിവേഗ റെയില്‍ ശൃംഖലയായി ഉയര്‍ത്തുന്നു

രാജ്യത്ത് മെയില്‍, എക്സ്പ്രസ് ട്രയിനുകളിലും നോണ്‍ എ.സി കോച്ചുകള്‍ ഒഴിവാക്കുന്നു. ഇന്ത്യന്‍ റെയില്‍വേ ശൃംഖലയെ അതിവേഗ റെയില്‍ ശൃംഖലയായി ഉയര്‍ത്തുവാനുള്ള വിപുലമായ പദ്ധതികളുടെ ഭാഗമായാണ് നീക്കം. പൂര്‍ണമായും ശീതീകരിച്ച ട്രെയിനുകളായിരിക്കും ഈ വിഭാഗത്തില്‍ സര്‍വീസ് നടത്തുക
130-160 വേഗതയില്‍ ഓടുന്ന ഹൈസ്പീഡ് ട്രെയിനുകളില്‍ നിന്നാണ് ആദ്യം നോണ്‍ എ.സി കോച്ചുകള്‍ മാറ്റുക. ഘട്ടം ഘട്ടമായി മറ്റ് ട്രെയിനുകളില്‍ നിന്നും നോണ്‍ എസി കോച്ചുകള്‍ ഉപേക്ഷിക്കും. കൂടുതല്‍ ട്രെയിനുകള്‍ ഹൈസ്പീഡ് ട്രെയിനുകളാക്കാനും റെയില്‍വേ തീരുമാനിച്ചു. സെമി ഹൈസ്പീഡ് ട്രെയനില്‍ നന്നും താമസിയാതെ നോണ്‍ എ.സി ഇല്ലാതാകും.
നോണ്‍ എ.സി കോച്ചുകള്‍ ഇല്ലാതാകുന്ന മുറയ്ക്ക് അത്തരം ട്രെയിനുകളില്‍ ചാര്‍ജ് വര്‍ധിപ്പിക്കാനും തീരുമാനമായിട്ടുണ്ട്. രണ്ടോ മൂന്നോ ഇരട്ടിയെങ്കിലും ചാര്‍ജ് ഉയരുമെന്നാണ് പുറത്തുവരുന്ന റിപ്പോര്‍ട്ട്.
എന്നാല്‍ 110 കിലോമീറ്റര്‍വരെ വേഗത്തില്‍ സഞ്ചരിക്കുന്നതും മെയില്‍ എക്സ്പ്രസ് വിഭാഗങ്ങളില്‍ പെടുന്നതുമായ ട്രെയിനുകളില്‍ സ്ലീപ്പര്‍ കോച്ചുകള്‍ അടക്കമുള്ളവ തുടരുമെന്നും റിപ്പോര്‍ട്ടുണ്ട്. തീവണ്ടികളുടെ വേഗം വര്‍ധിപ്പിക്കാനുള്ള ശ്രമങ്ങള്‍ തുടരുന്നുവെന്ന് റെയില്‍വെ വ്യക്തമാക്കുന്നു.
മണിക്കൂറില്‍ 130 കിലോമീറ്ററിലധികം വേഗത്തില്‍ സഞ്ചരിക്കുന്ന ട്രെയിനുകളില്‍ ഇതിന് ആവശ്യമായ സാങ്കേതിക മാറ്റങ്ങള്‍ ആവശ്യമാണ്. എസി കോച്ചുകള്‍ ഉള്‍പ്പെടെ ഇതിന്റെ ഭാഗമാണ്. ഹംസഫര്‍ ട്രെയിനുകളിലെ എ.സി 3 ചെയര്‍ കാറുകള്‍ക്ക് തുല്യമായിരിക്കും പുതിയ എ സി കോച്ചുകള്‍.