എഫ്എടിഎഫ് ബ്ലാക്ക് ലിസ്റ്റില്‍ ഉള്‍പ്പെടുന്നതില്‍ നിന്ന് ഒഴിവാകാന്‍ ചൈനയുടെ പിന്തുണ തേടി പാകിസ്ഥാന്‍

എഫ്എടിഎഫ് ബ്ലാക്ക് ലിസ്റ്റില്‍ ഉള്‍പ്പെടുന്നതില്‍ നിന്ന് ഒഴിവാകാന്‍ ചൈനയുടെ പിന്തുണ തേടി പാകിസ്ഥാന്‍. 40 നിര്‍ദേശങ്ങളില്‍ പാകിസതാന്‍ പാലിച്ചത് രണ്ടെണ്ണം മാത്രമാണെന്ന് എഷ്യാ പസഫിക് ഗ്രൂപ്പ് വിലയിരുത്തിയതിന് പിന്നാലെയാണ് പാകിസ്ഥാന്റെ നീക്കം. ചൈനയ്ക്ക് പിന്നാലെ മലേഷ്യ, തുര്‍ക്കി രാജ്യങ്ങളുടെ പിന്തുണയും പാകിസ്ഥാന്‍ തേടിയിട്ടുണ്ട്. 21,23 നാണ് പാകിസ്ഥാനെ ബ്ലാക്ക് ലിസ്റ്റ് ചെയ്യണമോ എന്ന ചര്‍ച്ച എഫ്എടിഎഫ് നടത്തുക.
2018 മുതല്‍ പാകിസ്താന്‍ എഫ്എടിഎഫിന്റെ ഗ്രേലിസ്റ്റിലാണ്. ബ്ലാക്ക് ലിസ്റ്റില്‍ നിന്നും ഒരു ചുവട് മാത്രമാണ് ഗ്രേലിസ്റ്റിന്റെ ദൂരം. ബ്ലാക്ക് ലിസ്റ്റില്‍ ഉള്‍പ്പെടുത്താതിരിക്കാന്‍ 40 നിര്‍ദേശങ്ങളും 27 നടപടി ആവശ്യങ്ങളും എഫ്എടിഎഫ് പാകിസ്ഥാന് നല്‍കിയിരുന്നു. 40 നിര്‍ദേശങ്ങളില്‍ പാകിസ്ഥാന്‍ ഇതുവരെ നടപ്പാക്കിയത് രണ്ടെണ്ണം മാത്രമാണ്. 27 നടപടി ആവശ്യങ്ങളില്‍ കേവലം 14 എണ്ണം മാത്രമാണ് നടപ്പിലാക്കിയത്. ഇനി പാകിസ്ഥാന് അവസരം നല്‍കാനും എഫ്എടിഎഫിന് സാധിക്കില്ല.
സാമ്പത്തിക പ്രതിസന്ധിയുടെ കാലത്ത് വിദേശ എജന്‍സികളുടെ ധനാഗമ മാര്‍ഗങ്ങള്‍ കൂടി നിലച്ചാല്‍ രാജ്യത്തിന്റെ അവസ്ഥ പരിതാപകരമായി മാറും. ഈ സാഹചര്യത്തിലാണ് ചൈന, തുര്‍ക്കി, മലേഷ്യ രാജ്യങ്ങളുടെ പിന്തുണ തേടാന്‍ പാകിസ്ഥാന്‍ ശ്രമിക്കുന്നത്.