തട്ടിക്കൊണ്ടുപോയി പീഡിപ്പിച്ച കേസില്‍ മുഖ്യപ്രതി അറസ്റ്റില്‍

ഫോണ്‍ മുഖേന ബന്ധം സ്ഥാപിച്ച് ഭര്‍തൃമതിയെ കാറില്‍ തട്ടിക്കൊണ്ടുപോയി പീഡിപ്പിച്ച കേസില്‍ മുഖ്യപ്രതി അറസ്റ്റില്‍. കഴിഞ്ഞ ഓഗസ്റ്റ് 25 നാണ് കേസിനാസ്പദമായ സംഭവം നടന്നത്. കാസര്‍ഗോഡ് സ്വദേശിയായ 24 കാരിയാണ് പീഡനത്തിനിരയായത്. യുവതിയെ വീടിനു സമീപത്തു നിന്ന് കാറില്‍ തട്ടിക്കൊണ്ടുപോയി നെല്ലിപ്പാറയിലെ ഒരു വീട്ടിലെത്തിച്ചു പീഡിപ്പിച്ചതായാണ് പരാതി.
പീഡിപ്പിച്ചതിന് ശേഷം വൈകുന്നേരത്തോടെയാണ് യുവതിയെ വിട്ടയച്ചത്. തുടര്‍ന്ന് യുവതി ഭര്‍ത്താവിനെ വിവരമറിയിക്കുകയും പൊലീസില്‍ പരാതി നല്‍കുകയുമായിരുന്നു. ആലക്കോട് നെല്ലിപ്പാറ കപ്പണയിലെ കുന്നത്തേല്‍ ബിജോയ് ജോസഫിനെ (40) യാണ് തളിപ്പറമ്പ് ഡിവൈഎസ്പി ടി.കെ. രത്നകുമാറും സംഘവും ചൊവ്വാഴ്ച്ച പുലര്‍ച്ചെ ഇരിട്ടിയില്‍ വച്ച് അറസ്റ്റ് ചെയ്തത്. കൂട്ടുപ്രതി ആലക്കോട് രയരോം സ്വദേശി കൊട്ടാരത്തില്‍ പ്രകാശ് കുര്യനെ (35) നേരത്തെ അറസ്റ്റ് ചെയ്തിരുന്നു. പൊലീസ് കേസെടുത്തതോടെ രക്ഷപ്പെടാന്‍ ശ്രമിച്ച പ്രകാശ് കുര്യനെ കഴിഞ്ഞ 27 ന് തളിപ്പറമ്പില്‍ വച്ച് ഡിവൈഎസ്പി ടി.കെ. രത്‌നകുമാറും സംഘവും അറസ്റ്റ് ചെയ്തിരുന്നെങ്കിലും ബിജോയ് ജോസഫ് കാസര്‍ഗോഡേക്ക് രക്ഷപ്പെടുകയായിരുന്നു. മൊബൈല്‍ നമ്പര്‍ കേന്ദ്രീകരിച്ചു നടത്തിയ അന്വേഷണത്തില്‍ പ്രതിയെ തേടി പൊലീസ് സംഘം ഇവിടേക്ക് എത്തിയെങ്കിലും ഇയാള്‍ ഇരിട്ടിയിലേക്ക് രക്ഷപ്പെട്ടു. ഇവിടുന്നു കര്‍ണാടകയിലേക്കു കടക്കാന്‍ ശ്രമിക്കുന്നതിനിടെയാണ് തിങ്കളാഴ്ച്ച പുലര്‍ച്ചെ പിടിയിലായത്.